జన గళం ఆంధ్రప్రదేశ్ డెస్క్: ఉమ్మడి గోదావరి జిల్లాల్లో గోదావరి నది వరద ఉధృతి క్రమంగా పెరుగుతోంది. ధవలేశ్వరం బ్యారేజీ వద్ద నీటిమట్టం 11.60 అడుగులకు చేరుకోవడంతో అధికారులు అప్రమత్తమయ్యారు. దిగువకు భారీగా నీటిని విడుదల చేసేందుకు బ్యారేజీలోని మొత్తం 175 గేట్లను ఎత్తివేశారు. దీని ద్వారా సుమారు 9.65 లక్షల క్యూసెక్కుల నీటిని దిగువకు విడుదల చేస్తున్నట్లు నీటిపారుదల శాఖ అధికారులు వెల్లడించారు. వరద ఉధృతి మరింత పెరిగే అవకాశం ఉన్నందున నదీ పరీవాహక ప్రాంతాల ప్రజలు అప్రమత్తంగా ఉండాలని హెచ్చరికలు జారీ చేశారు.
మరోవైపు పోలవరం జిల్లాలో గోదావరితో పాటు శబరి నదులు కూడా అత్యంత ఉధృతంగా ప్రవహిస్తున్నాయి. ఎకాయెకిన పెరుగుతున్న ప్రవాహాల కారణంగా పోలవరం పరిసర ప్రాంతాలు జలదిగ్బంధంలో చిక్కుకునే పరిస్థితి ఏర్పడింది. నదుల ఉధృతి తీవ్రత ఎక్కువగా ఉండటంతో లోతట్టు ప్రాంతాలు పూర్తిగా నీట మునిగాయి. ముఖ్యంగా 50కి పైగా లోతట్టు గ్రామాలకు రాకపోకలు పూర్తిగా నిలిచిపోయాయి. దీనివల్ల ఆయా గ్రామాల ప్రజలు నిత్యావసరాలు, ఇతర అవసరాల కోసం తీవ్ర ఇబ్బందులు ఎదుర్కొంటున్నారు.
వరద తీవ్రతను దృష్టిలో ఉంచుకుని రాష్ట్ర ప్రభుత్వం మరియు జిల్లా యంత్రాంగం సహాయక చర్యలను ముమ్మరం చేశాయి. ఎన్డీఆర్ఎఫ్, ఎస్డీఆర్ఎఫ్ బృందాలను అప్రమత్తం చేసి, సహాయక శిబిరాలను ఏర్పాటు చేసేందుకు ఏర్పాట్లు చేస్తున్నారు. లోతట్టు ప్రాంతాల ప్రజలను సురక్షిత ప్రాంతాలకు తరలించే ప్రక్రియను అధికారులు వేగవంతం చేశారు. ప్రాణనష్టం జరగకుండా ముందస్తు జాగ్రత్త చర్యలు చేపడుతున్నట్లు అధికారులు తెలిపారు. ప్రజలు ఎవరూ నదిలోకి వెళ్లవద్దని, అత్యవసరమైతేనే అధికారులను సంప్రదించాలని విజ్ఞప్తి చేశారు.
Slug: godavari-floods-dhywaleswaram-barrage-water-level