జన గళం మచిలీపట్నం డెస్క్: కృష్ణా జిల్లా కేంద్రం మచిలీపట్నం (బందరు) రాజకీయాల్లో మేయర్ పదవి చుట్టూ జరుగుతున్న అంతర్గత లెక్కలు ఇప్పుడు సర్వత్రా ఆసక్తికర చర్చకు దారితీస్తున్నాయి. త్వరలో జరగనున్న స్థానిక సంస్థల సమరంలో బందరు మేయర్ కుర్చీ కేవలం ఒక సాధారణ మున్సిపల్ పీఠం మాత్రమే కాదని, రాబోయే రోజుల్లో జిల్లా రాజకీయాలను, వ్యాపార రంగాన్ని శాసించే అత్యంత కీలక శక్తిగా మారబోతోందని రాజకీయ విశ్లేషకులు స్పష్టం చేస్తున్నారు.
రాష్ట్రానికి మణిహారంగా రూపుదిద్దుకుంటున్న బందరు పోర్టు నిర్మాణం పూర్తిస్థాయిలో పరుగులు తీస్తుండటంతో, దాని అనుబంధంగా భారీ లాజిస్టిక్స్ పార్కులు, విస్తృత రవాణా వ్యవస్థ, బహుళజాతి పరిశ్రమలు, రియల్ ఎస్టేట్ వెంచర్లు మరియు వేల కోట్ల పెట్టుబడులు బందరును చుట్టుముట్టనున్నాయి. దీంతో మచిలీపట్నం సాధారణ పట్టణ స్థాయి నుంచి అంతర్జాతీయ పారిశ్రామిక హబ్‌గా రూపాంతరం చెందనుంది. ఈ క్రమంలో కేంద్ర, రాష్ట్ర స్థాయి మంత్రులు, ఉన్నతాధికారులు, బడా పారిశ్రామికవేత్తలు, కార్పొరేట్ కంపెనీల ప్రతినిధుల తాకిడి నిత్యం ఉండనుంది. నగరానికి ప్రథమ పౌరుడిగా ఉండే మేయర్‌కు సహజంగానే వారందరితో అధికారిక, వ్యక్తిగత సంబంధాలు, గుర్తింపు దక్కే గొప్ప అవకాశం ఉంటుంది.
అందుకే బందరు మేయర్ పదవిని కేవలం జీతం, ప్రోటోకాల్ అధికారాలతో లెక్కిస్తే అసలు విలువ అర్థం కాదని భావిస్తున్నారు. రాజకీయంగా మరింత ఎత్తుకు ఎదగాలనుకునే నాయకుడికి విస్తృత ప్రజాదరణ, వ్యాపార-పరిశ్రమల ప్రపంచంతో బలమైన బంధాలు, భవిష్యత్ అసెంబ్లీ లేదా పార్లమెంట్ రాజకీయాలకు తిరుగులేని వేదిక.. ఇవన్నీ ఒక్క మేయర్ కుర్చీ ద్వారానే సాధ్యమవుతాయి. “బందరు మేయర్ ఎవరు?” అనే దానికంటే.. రేపటి బందరుపై ఎవరి రాజకీయ ప్రభావం ఉండబోతోందనేదే అసలు ప్రశ్న. పోర్టు రాకతో బందరు విలువ ఎంతగా ఆకాశాన్ని తాకుతుందో, ఆ కుర్చీ పవర్ కూడా అంతే పెరుగుతుందని రాజకీయ చతురత, లెక్కలు తెలిసిన నాయకులకు ఇప్పటికే స్పష్టంగా అర్థమైందని రాజకీయ విశ్లేషకుడు తోట మనోహర్ తన సామాజిక విశ్లేషణలో పేర్కొన్నారు.