జన గళం ఆంధ్రప్రదేశ్ డెస్క్: ప్రపంచ దేశాలతో పోలిస్తే భారతదేశం అన్ని రంగాలలో ఎంతో ముందుకు దూసుకుపోతోందని భారతీయ వికాస్ పరిషత్ జాతీయ సేవా కన్వీనర్ షా రూప్ చంద్ జైన్ స్పష్టం చేశారు. బుధవారం మచిలీపట్నంలోని జగన్నాథపురం ఎస్ఎస్ఆర్ డిగ్రీ కాలేజీలో భారతీయ వికాస్ పరిషత్ ఆధ్వర్యంలో ప్రత్యేక సమావేశం నిర్వహించారు. ఈ సందర్భంగా ఆయన మాట్లాడుతూ దేశ ఐక్యతను చాటిచెప్పడానికి నిరంతరం దేశవ్యాప్తంగా లక్షలాది మంది కార్యకర్తలు శ్రమిస్తున్నారని తెలిపారు. మచిలీపట్నం మరియు పెడన పరిసర ప్రాంతాల విద్యార్థిని విద్యార్థులకు దేశభక్తిపై ప్రత్యేక పోటీలు నిర్వహించి సుమారు రెండు వందల మందికి బహుమతులు అందజేయడం అభినందనీయమని ఆయన కొనియాడారు.
ఈ కార్యక్రమానికి ముఖ్య అతిథిగా విచ్చేసిన మచిలీపట్నం బార్ అసోసియేషన్ మాజీ అధ్యక్షులు, న్యాయవాది లంకిశెట్టి బాలాజీ మాట్లాడుతూ విద్యార్థులు చట్టాల పట్ల అవగాహన పెంపొందించుకోవాలని సూచించారు. నేటి సామాజిక పరిస్థితుల్లో నైతిక విలువలతో కూడిన విద్య ఆవశ్యకత ఎంతైనా ఉందని ఆయన పేర్కొన్నారు. తల్లిదండ్రులు, ఉపాధ్యాయులు విద్యార్థుల ప్రవర్తన పట్ల నిరంతరం అప్రమత్తంగా ఉండాలని, పిల్లలను టీవీలు మరియు సెల్ ఫోన్లకు దూరంగా ఉంచి వారి ఉజ్వల భవిష్యత్తుకు సరైన దిశానిర్దేశం చేయాలని ఆయన హితవు పలికారు.
ఈ సమావేశంలో భారతీయ వికాస్ పరిషత్ నైతిక విలువల కమిటీ చైర్మన్ వి. హనుమంతరావు మాట్లాడుతూ దేశ సమగ్ర అభివృద్ధిలో సంస్థ భాగస్వామ్యం కావడం గర్వకారణమని వెల్లడించారు. సంస్థ ఉపాధ్యక్షులు కొత్తగుండు రమేష్, కార్యదర్శి వి. నాగప్రవీణ్ మాట్లాడుతూ కొత్తగా తీసుకువచ్చిన వందేమాతరం గీతాన్ని పరిషత్ ద్వారా పదివేల మందితో ఆలపించేలా చేశామని, విద్యార్థులకోసం నిర్వహించిన పోటీల విజేతలకు బహుమతులు ప్రదానం చేశామని తెలిపారు. ఈ కార్యక్రమంలో కోశాధికారి వి.వి. రమణ, ఆంధ్రప్రదేశ్ ప్రభుత్వ పాఠశాలల సంఘ ఉపాధ్యక్షులు స్వామి, మాదిరెడ్డి బాబా, పలు పాఠశాలల ఉపాధ్యాయులు, తల్లిదండ్రులు మరియు విద్యార్థులు పెద్ద సంఖ్యలో పాల్గొన్నారు.
Slug: machilipatnam-bharatiya-vikas-parishad-meeting-patriotism-event