జన గళం ఆంధ్రప్రదేశ్ డెస్క్: ఆంధ్రప్రదేశ్ రాష్ట్ర ప్రభుత్వ ఉద్యోగుల వేతన సవరణ సంఘం పీఆర్సీ కమిషనర్ నియామకంపై స్పష్టత వచ్చేసింది. ఉద్యోగుల పీఆర్సీ కమిషనర్‌గా రిటైర్డ్ ప్రభుత్వ ప్రధాన కార్యదర్శి దినేష్ కుమార్ పేరును రాష్ట్ర ముఖ్యమంత్రి నారా చంద్రబాబు నాయుడు ఖరారు చేసినట్లు ప్రభుత్వ వర్గాల ద్వారా సమాచారం అందుతోంది. దీనికి సంబంధించి నేడో రేపో అధికారిక ఉత్తర్వులు వెలువడే అవకాశం ఉంది. నిజాయితీపరుడిగా, అత్యంత సమర్థుడైన అధికారిగా పేరున్న దినేష్ కుమార్ వైపు సీఎం చంద్రబాబు స్వయంగా మొగ్గు చూపినట్లు తెలుస్తోంది.
గతంలో తిరుమల తిరుపతి దేవస్థానం కల్తీ నెయ్యి కుంభకోణం వ్యవహారంలో బాధ్యులైన నిందితులపై తీసుకోవాల్సిన చర్యలపై విచారణ జరిపేందుకు దినేష్ కుమార్ ఆధ్వర్యంలో ప్రభుత్వం ఏకసభ్య కమిషన్‌ను ఏర్పాటు చేసింది. ఆ కమిషన్ అత్యంత బాధ్యతాయుతంగా వ్యవహరించి సకాలంలో ప్రభుత్మానికి నివేదికను సమర్పించింది. పరిపాలనా రంగంలో ఆయన చూపిన అంకితభావం, సమర్థతను దృష్టిలో ఉంచుకునే ముఖ్యమంత్రి ఈ కీలక పదవికి ఆయన పేరును ఖరారు చేసినట్లు అధికార వర్గాలు పేర్కొంటున్నాయి.
ఉద్యోగుల సంక్షేమం మరియు వారి వేతన సవరణకు సంబంధించి త్వరలోనే పీఆర్సీ కమిషన్ తన విధివిధానాలను ప్రారంభించే అవకాశం ఉంది. ఉద్యోగ సంఘాల డిమాండ్లు, రాష్ట్ర ఆర్థిక పరిస్థితులను బేరీజు వేసుకుంటూ సమగ్ర సిఫార్సులు రూపొందించడంలో దినేష్ కుమార్ అనుభవం ప్రభుత్వానికి ఎంతో దోహదపడుతుందని భావిస్తున్నారు. త్వరలోనే ఈ నియామకానికి సంబంధించి పూర్తి స్థాయి ఉత్తర్వులు వెలువడనున్నాయి.
Slug: ap-new-prc-commissioner-retire-cs-dinesh-kumar-appointed