జన గళం క్రైమ్ డెస్క్: నిజామాబాద్ జిల్లాలో తీవ్ర కలకలం రేపిన ఘటనలో భీమ్‌గల్ పోలీస్ స్టేషన్‌లోనే ఓ వ్యక్తి బలవన్మరణానికి యత్నించడం సంచలనం సృష్టించింది. పోలీస్ స్టేషన్ ఆవరణలో జరిగిన ఈ అవాంఛనీయ ఘటన స్థానికంగా మరియు పోలీసు వర్గాల్లో తీవ్ర ఆందోళన కలిగించింది. వివరాల్లోకి వెళితే.. భీమ్‌గల్ పోలీస్ స్టేషన్ పరిధిలో హోటల్ బయట టేబుళ్లు పెట్టారనే విషయానికి సంబంధించి పోలీసులు సుధాకర్ అనే వ్యక్తిపై కేసు నమోదు చేసినట్లు సమాచారం. ఈ కేసుకు సంబంధించి తదుపరి విచారణ నిమిత్తం కోర్టుకు హాజరు కావాలంటూ పోలీసులు సుధాకర్ను స్టేషన్‌కు పిలిపించారు.
స్టేషన్‌కు వెళ్లిన సుధాకర్, ఈ పరిణామంతో తీవ్ర మనస్తాపానికి గురై క్షణికావేశంలో తీవ్ర నిర్ణయం తీసుకున్నట్లు కుటుంబ సభ్యులు ఆరోపిస్తున్నారు. పోలీస్ స్టేషన్ పరిసరాల్లోనే తన ఒంటిపై పెట్రోల్ పోసుకుని ఒక్కసారిగా నిప్పంటించుకోవడంతో అక్కడ ఒక్కసారిగా గందరగోళం చెలరేగింది. వెంటనే అప్రమత్తమైన సిబ్బంది, స్థానికులు స్పందించి మంటలను ఆర్పేందుకు ప్రయత్నించారు. తీవ్ర గాయాలతో సృహ కోల్పోయిన సుధాకర్ను తక్షణమే మెరుగైన వైద్యం కోసం ఆర్మూర్ ఆసుపత్రికి తరలించారు. ప్రస్తుతం ఆయన ఆరోగ్య పరిస్థితి అత్యంత విషమంగా ఉన్నట్లు వైద్యులు వెల్లడించినట్లు తెలుస్తోంది.
ఈ ఘటనపై సమాచారం అందుకున్న బాధితుడి కుటుంబ సభ్యులు, బంధువులు ఆసుపత్రి వద్ద ఆందోళన వ్యక్తం చేస్తూ పోలీసుల తీరుపై తీవ్ర నిరసన తెలిపారు. చిన్న విషయానికి కేసు నమోదు చేసి, స్టేషన్‌కు పిలిపించి వేధించడం వలనే సుధాకర్ ఈ అఘాయిత్యానికి పాల్పడ్డారని వారు ఆరోపిస్తున్నారు. ఈ ఘటనకు గల పూర్తి వివరాలపై ఉన్నతాధికారులు ఆరా తీస్తున్నట్లు సమాచారం. పోలీస్ స్టేషన్ ప్రాంగణంలోనే ఈ ఘటన చోటుచేసుకోవడంపై సర్వత్రా విమర్శలు వ్యక్తమవుతున్నాయి.
Slug: nizamabad-bheemgal-police-station-suicide-attempt-sudhakar