జన గళం ఆంధ్రప్రదేశ్ డెస్క్: విజయవాడ ఇంద్రకీలాద్రిపై కొలువైన శ్రీ దుర్గా మల్లేశ్వర స్వామివార్ల దేవస్థానంలో దసరా శరన్నవరాత్రి మహోత్సవాలు అక్టోబర్‌ 11 నుంచి 20వ తేదీ వరకు నిర్వహించనున్నారు. పది రోజుల పాటు అమ్మవారు వివిధ దివ్య అలంకారాల్లో భక్తులకు దర్శనమివ్వనున్నారు. ఉత్సవాలకు ఆలయ అధికారులు విస్తృత ఏర్పాట్లు చేశారు. సాధారణ భక్తులకు ఇబ్బందులు కలగకుండా దర్శన ఏర్పాట్లపై ప్రత్యేక దృష్టి సారించారు.
ఆలయ ఉత్సవాల షెడ్యూల్‌ ప్రకారం అక్టోబర్‌ 11న శ్రీ బాలా త్రిపుర సుందరీదేవి, 12న శ్రీ గాయత్రీదేవి, 13న శ్రీ అన్నపూర్ణాదేవి, 14న శ్రీ మహాచండీదేవి, 15న శ్రీ లలితా త్రిపుర సుందరీదేవి అలంకారాల్లో అమ్మవారు దర్శనమివ్వనున్నారు. అక్టోబర్‌ 16న మూలా నక్షత్రం సందర్భంగా శ్రీ సరస్వతీదేవి అలంకారం ప్రత్యేక ఆకర్షణగా నిలవనుంది.
అక్టోబర్‌ 17న శ్రీ మహాలక్ష్మీదేవి, 18న శ్రీ దుర్గాదేవి, 19న శ్రీ మహిషాసురమర్దినీదేవి, 20న విజయదశమి సందర్భంగా శ్రీ రాజరాజేశ్వరీదేవి అలంకారాల్లో అమ్మవారు భక్తులకు దర్శనమిస్తారు. విజయదశమి రోజున కృష్ణానదిలో తెప్పోత్సవం నిర్వహించేందుకు కూడా ఏర్పాట్లు చేస్తున్నారు.
దసరా ఉత్సవాల సందర్భంగా పెద్ద సంఖ్యలో భక్తులు ఇంద్రకీలాద్రికి తరలివచ్చే అవకాశం ఉండటంతో దర్శన క్యూలు, రవాణా, భద్రత, తాగునీరు తదితర సదుపాయాలపై అధికారులు దృష్టి సారించారు. భక్తులు ఆలయ అధికారిక ప్రకటనల్లోని దర్శన సమయాలు, టికెట్ల వివరాలు తెలుసుకుని అమ్మవారిని దర్శించుకోవాలని సూచిస్తున్నారు.