జన గళం ప్రత్యేక విభాగం: జనసేన పార్టీని క్షేత్రస్థాయిలో మరింత తిరుగులేని శక్తిగా తీర్చిదిద్దేందుకు నాయకులు, శ్రేణులు నిరంతరం ప్రజల్లోనే ఉండాలని పార్టీ ప్రధాన కార్యదర్శి శ్రీ రామ్ తాళ్లూరి గారు పిలుపునిచ్చారు. పార్టీ సంస్థాగత నిర్మాణం, రాబోయే స్థానిక ఎన్నికల సన్నద్ధతపై ఆయన ముఖ్య నాయకులకు దిశానిర్దేశం చేశారు.
రాజకీయాల్లో యువ నాయకత్వం ఎదగాలని పార్టీ అధ్యక్షులు, ఉప ముఖ్యమంత్రి శ్రీ పవన్ కళ్యాణ్ గారు ఎల్లప్పుడూ ఆకాంక్షిస్తారని గుర్తుచేసిన రామ్ తాళ్లూరి గారు, పార్టీ భవిష్యత్ కార్యాచరణపై పలు కీలక అంశాలను స్పష్టం చేశారు.
ప్రధాన కార్యదర్శి రామ్ తాళ్లూరి ప్రసంగంలోని ముఖ్యాంశాలు:
- యువ నాయకత్వానికి పెద్దపీట: రాజకీయాల్లో నవ చైతన్యాన్ని నింపేందుకు విద్యావంతులైన యువతను ప్రోత్సహించాలని పవన్ కళ్యాణ్ గారి ఆశయం. అందుకనుగుణంగా క్షేత్రస్థాయిలో పార్టీ పగ్గాలను యువ నాయకులకు అప్పగించనున్నాం.
- బలమైన ఇన్‌చార్జుల నియామకం: క్షేత్రస్థాయిలో ప్రజాభిమానం కలిగి, నిరంతరం పనిచేసే నిబద్ధత గల నాయకులనే వివిధ నియోజకవర్గాలు, మండలాల ఇన్‌చార్జులుగా నియమిస్తాం.
- ఎన్నికల సన్నద్ధత: అన్ని రకాల సంస్థాగత బలాలు, బూత్ స్థాయి కమిటీలను పకడ్బందీగా సిద్ధం చేసుకున్న తర్వాతే పూర్తి విశ్వాసంతో ఎన్నికల సమరంలోకి దిగుతాం.
- మరో రెండేళ్లు పట్టుదలతో శ్రమించాలి: పార్టీ కోసం గత పన్నెండేళ్లుగా కార్యకర్తలు, నాయకులు పడిన అపారమైన కష్టం వృధా కాకుండా ఉండేందుకు.. వచ్చే రెండేళ్లపాటు అంతే నిబద్ధతతో, రెట్టింపు ఉత్సాహంతో కష్టపడి పనిచేయాలి.
- పాత-కొత్త కలయికకు సమ ప్రాధాన్యం: పార్టీ సిద్ధాంతాలను నమ్మి కొత్తగా వచ్చే వారికి సాదరంగా ఆహ్వానం పలుకుతూనే, పార్టీ ఆవిర్భావం నుండి అండగా నిలిచిన సీనియర్లకు సముచిత స్థానం, తగిన గౌరవం కల్పిస్తాం.
నాయకులంతా ప్రజల సమస్యల పరిష్కారమే లక్ష్యంగా క్షేత్రస్థాయిలో పనిచేస్తూ, పవన్ కళ్యాణ్ గారి ఆలోచనలను ప్రతి గడపకూ చేర్చాలని రామ్ తాళ్లూరి గారు శ్రేణులకు దిశానిర్దేశం చేశారు.