జన గళం పెడన/బంటుమిల్లి బ్యూరో: కృష్ణా జిల్లా పెడన నియోజకవర్గ పరిధిలోని మేజర్ గ్రామ పంచాయతీ పెదతుమ్మిడిలో తాగునీటి సరఫరా, పారిశుద్ధ్యం మరియు స్థానిక ఆక్రమణల సమస్యలను పరిష్కరించాలని కోరుతూ స్థానిక శాసనసభ్యులు శ్రీ కాగిత కృష్ణ ప్రసాద్‌కు గ్రామస్థులు, ‘మేము సైతం పెదతుమ్మిడి’ వాట్సాప్ గ్రూప్ సభ్యులు బహిరంగ వినతిపత్రం సమర్పించారు.
గ్రామంలోని మంచినీటి చెరువు వద్ద ప్రస్తుతం జరుగుతున్న ఫిల్టర్ల రిపేర్లలో నాణ్యతా ప్రమాణాలు పాటించేలా చూడాలని గ్రామస్తులు కోరారు. గతంలో ఫిల్టర్లలో సాధారణ గండ్ర ఇసుక వాడటం వల్ల సమస్యలు వచ్చాయని, ఈసారి ఫిల్ట్రేషన్ కోసం ఉపయోగించే ప్రత్యేకమైన ఇసుక, చిప్స్, కంకర రాళ్లను కాంట్రాక్టర్‌తో తెప్పించి, గ్రామ పెద్దల సమక్షంలో నాణ్యత పరిశీలించిన తర్వాతే నింపేలా అధికారులను ఆదేశించాలని విజ్ఞప్తి చేశారు. అలాగే, మైక్రో ఫిల్టర్ల వద్ద మోటార్ లేదన్న కారణంతో నూతన వాటర్ ట్యాంక్‌ను వినియోగంలోకి తేకుండా నిలిపివేశారని, మేజర్ గ్రామమైనందున అత్యవసర సమయాల్లో వినియోగించేందుకు స్పేర్ మోటార్లను అందుబాటులో ఉంచాలని పేర్కొన్నారు. దీనివల్ల మోటార్ పాడైనా తాగునీటి సరఫరాకు అంతరాయం కలగకుండా ఉంటుందని తెలిపారు. గ్రామంలో అధ్వానంగా మారిన డ్రైనేజీ వ్యవస్థకు ప్రత్యామ్నాయంగా ఎప్పటినుంచో ప్రతిపాదనలో ఉన్న ‘మ్యాజిక్ డ్రైన్’ పనులను చేపట్టాలని, అవసరమైన చోట్ల అదనపు మైక్రో ఫిల్టర్లు ఏర్పాటు చేయాలని కోరారు. మరోవైపు, చెరువు పరిసరాల్లో మరియు పాలకేంద్రం వద్ద ఉన్న ఆక్రమణలపై అధికారులు వివక్ష చూపకుండా సమగ్రంగా చర్యలు తీసుకోవాలని, లేనిపక్షంలో తొలగించిన వారు తిరిగి దుకాణాలు ఏర్పాటు చేసుకుంటామని హెచ్చరిస్తున్నారని ఎమ్మెల్యే దృష్టికి తీసుకెళ్లారు. గ్రామ సమగ్ర సమస్యలపై ఎమ్మెల్యే తక్షణమే స్పందించి పరిష్కరించాలని పెదతుమ్మిడి వాసులు విజ్ఞప్తి చేశారు.
