జన గళం పామర్రు బ్యూరో: కృష్ణా జిల్లా పామర్రు నియోజకవర్గంలో వైఎస్సార్ కాంగ్రెస్ పార్టీకి గట్టి ఎదురుదెబ్బ తగిలింది. ఆ పార్టీ రాష్ట్ర కార్యదర్శి, ఆవిర్భావం నుంచి క్రియాశీలకంగా వ్యవహరిస్తున్న కీలక నేత దొంతిరెడ్డి శ్రీరామ్‌రెడ్డి తెలుగుదేశం పార్టీలో చేరాలని నిర్ణయించుకున్నారు. అక్టోబరు 11న తన సన్నిహిత నాయకులు, భారీ సంఖ్యలో అనుచరులతో కలిసి ఆయన పచ్చ కండువా కప్పుకోనున్నారు. గతంలో వైఎస్ జగన్మోహన్‌రెడ్డి చేపట్టిన ఓదార్పు యాత్ర సమయంలో పామర్రులో జగన్ శ్రీరామ్‌రెడ్డి నివాసంలోనే బస చేశారు. అంతేకాకుండా, ఆయన సతీమణి దొంతిరెడ్డి కవిత 2019-2024 మధ్య పామర్రు మార్కెట్ యార్డ్ చైర్మన్‌గా పనిచేశారు.
నియోజకవర్గవ్యాప్తంగా బలమైన కేడర్, సామాజిక వర్గాలతో విస్తృత సంబంధాలు ఉన్న సీనియర్ నేత శ్రీరామ్‌రెడ్డి పార్టీని వీడటం వైఎస్సార్‌సీపీకి తీవ్ర నష్టంగా మారనుంది. త్వరలోనే స్థానిక సంస్థల ఎన్నికలు జరగనున్న వేళ, పామర్రులో శ్రీరామ్‌రెడ్డి టీడీపీ చేరిక కూటమికి మరింత రాజకీయ బలాన్ని చేకూర్చనుందని రాజకీయ విశ్లేషకులు భావిస్తున్నారు.
