జన గళం ఆంధ్రప్రదేశ్ డెస్క్: మంగళగిరిలోని జనసేన పార్టీ రాష్ట్ర ప్రధాన కార్యాలయంలో ప్రజా సమస్యల పరిష్కారమే వేదికగా ‘జనవాణి’ కార్యక్రమం కొనసాగింది. రాష్ట్రంలోని వివిధ ప్రాంతాల నుంచి తరలివచ్చిన ప్రజలు తమ సమస్యలు, వినతులను పార్టీ నేతల దృష్టికి తీసుకువచ్చారు. ఈ కార్యక్రమంలో ఉమ్మడి పశ్చిమ గోదావరి జిల్లా డీసీఎంఎస్ చైర్మన్ చాగంటి మురళీ కృష్ణ (చిన్న), క్షత్రియ కార్పొరేషన్ డైరెక్టర్ వాసు రాజు, ఆకివీడు ఏఎంసీ వైస్ చైర్మన్ గవర లక్ష్మి పాల్గొని బాధితుల నుంచి స్వయంగా అర్జీలను స్వీకరించారు.
ప్రజలు సమర్పించిన వినతులను పరిశీలించిన నేతలు, వెంటనే సంబంధిత ప్రభుత్వ శాఖల అధికారులతో ఫోన్లో మాట్లాడి సమస్యల తీవ్రతను వివరించారు. అర్జీదారులకు సత్వర న్యాయం జరిగేలా, సమస్యలు త్వరితగతిన పరిష్కారమయ్యేలా అధికారులు చొరవ తీసుకోవాలని సూచించారు. జనసేన పార్టీ ఎల్లప్పుడూ ప్రజల పక్షాన నిలబడి వారి సమస్యల పరిష్కారానికి కృషి చేస్తుందని, ఉపముఖ్యమంత్రి పవన్ కళ్యాణ్ ఆశయాలకు అనుగుణంగా ప్రతి సమస్యను ప్రభుత్వ యంత్రాంగం దృష్టికి తీసుకెళ్లి పరిష్కారమయ్యే వరకు బాధితులకు అండగా ఉంటామని నేతలు స్పష్టం చేశారు.
