జన గళం ఆంధ్రప్రదేశ్ డెస్క్: వ్యవసాయం, వ్యవసాయ అనుబంధ రంగాల సమగ్రాభివృద్ధితో పాటు పర్యావరణ పరిరక్షణ, గ్రామీణ యువతకు సుస్థిరమైన జీవనోపాధి కల్పనపై సమగ్రంగా దృష్టి సారించాల్సిన ఆవశ్యకత ఉందని ఏపీ గ్రీన్ సొసైటీ ఎగ్జిక్యూటివ్ కమిటీ ఛైర్మన్ శ్రీ కొణిదెల నాగబాబు స్పష్టం చేశారు. ‘స్వచ్ఛతా హీ సేవా 2026’ కార్యక్రమంలో భాగంగా గుంటూరు సమీపంలోని లామ్లో ఉన్న కృషి విజ్ఞాన కేంద్రం (KVK)లో శుక్రవారం నిర్వహించిన వృక్షారోపణ కార్యక్రమంలో ఆయన ముఖ్య అతిథిగా పాల్గొన్నారు. స్వయంగా మొక్కలు నాటిన నాగబాబు, ప్రతి ఒక్కరూ పర్యావరణ పరిరక్షణను సామాజిక బాధ్యతగా స్వీకరించాలని పిలుపునిచ్చారు. భవిష్యత్తులో గ్రామీణ ప్రాంతాలకు ఆధునిక వ్యవసాయ పద్ధతులు, ప్రకృతి ఆధారిత జీవనోపాధులు, నైపుణ్య శిక్షణలే కీలక ఉపాధి వనరులుగా మారతాయని పేర్కొన్నారు.
రాష్ట్రవ్యాప్తంగా పర్యావరణ కార్యక్రమాలను సమర్థవంతంగా విస్తరించే లక్ష్యంతో కృషి విజ్ఞాన కేంద్రం (లామ్) తో ఏపీ గ్రీన్ అవగాహన ఒప్పందం (MoU) కుదుర్చుకునేందుకు సన్నాహాలు చేస్తున్నట్లు వెల్లడించారు. కేవీకే పరిధిలోని భూమిని వినియోగంలోకి తెచ్చి భారీ ‘ట్రీ బ్యాంక్’, ఆధునిక నర్సరీని ఏర్పాటు చేయాలని ప్రతిపాదించారు. దీని ద్వారా నాణ్యమైన మొక్కలను పెంచి, ఏపీ గ్రీన్ చేపట్టే బృహత్తర వృక్షారోపణ కార్యక్రమాలకు నిరంతరం సరఫరా చేసే వీలు కలుగుతుందన్నారు. అనంతరం కేవీకేలో గ్రామీణ యువతకు అందిస్తున్న ‘స్టింగ్లెస్ బీ’ (కుట్టని తేనెటీగలు), సాధారణ తేనెటీగల పెంపకం శిక్షణను ఆయన పరిశీలించి, శిక్షణార్థులతో మాట్లాడారు. స్వయం ఉపాధితో పాటు అదనపు ఆదాయాన్ని అందించే ఇలాంటి వినూత్న కోర్సులను యువత సద్వినియోగం చేసుకోవాలని సూచించారు. ఈ కార్యక్రమంలో ఏపీ గ్రీన్ సీఈవో శ్రీ బి.ఎన్.ఎన్. మూర్తి, అటవీ శాఖ సలహాదారు శ్రీ మల్లికార్జునరావు, గుంటూరు డీఎఫ్వో శ్రీమతి ఎం. హిమశైలజ, కృషి విజ్ఞాన కేంద్రం డైరెక్టర్ డాక్టర్ ఎం. యుగంధర్ తదితరులు పాల్గొన్నారు.
Slug: ap-green-chairman-nagababu-proposes-tree-bank-lam-guntur-kvk-swachhata-hi-seva