జన గళం ఆధ్యాత్మిక విభాగం, తిరుమల: కలియుగ వైకుంఠమైన తిరుమల పుణ్యక్షేత్రంలో భక్తుల రద్దీ భారీగా పెరిగింది. వారాంతం కావడంతో శ్రీ వేంకటేశ్వరస్వామి వారి దర్శనార్థం వివిధ ప్రాంతాల నుంచి తరలివచ్చిన భక్తులతో సప్తగిరులు కిటకిటలాడుతున్నాయి. వైకుంఠం క్యూ కాంప్లెక్స్లోని అన్ని కంపార్ట్మెంట్లు భక్తులతో పూర్తిగా నిండిపోయి, వెలుపల శిలాతోరణం వరకు క్యూలైన్లలో వేచి ఉన్నారు.
ప్రస్తుత రద్దీ దృష్ట్యా స్వామివారి ఉచిత సర్వదర్శనానికి సుమారు 20 గంటల సమయం పడుతుండగా, నిర్దేశిత సమయ సర్వదర్శనం (SSD) టోకెన్లు కలిగిన భక్తులకు దాదాపు 6 గంటల సమయం పడుతోంది. అలాగే రూ.300 ప్రత్యేక ప్రవేశ దర్శనానికి దాదాపు 4 గంటల సమయం పడుతున్నట్లు టీటీడీ అధికారులు వెల్లడించారు. నిన్న ఒక్కరోజే (సెప్టెంబర్ 25న) స్వామివారిని 66,014 మంది భక్తులు దర్శించుకోగా, 31,092 మంది భక్తులు తలనీలాలు సమర్పించి మొక్కులు చెల్లించుకున్నారు. నిన్న ఒక్కరోజే శ్రీవారి హుండీ ద్వారా రూ.4.44 కోట్ల ఆదాయం లభించింది. క్యూలైన్లలో వేచి ఉన్న భక్తులకు ఎలాంటి అసౌకర్యం కలగకుండా టీటీడీ నిరంతరం అన్నప్రసాదాలు, పాలు, తాగునీరు అందిస్తూ విస్తృత ఏర్పాట్లు చేపట్టింది.
