జన గళం అమరావతి బ్యూరో: ఆంధ్రప్రదేశ్ ప్రభుత్వం సోషల్ మీడియా ప్రచార వేదికలను సమర్థవంతంగా వినియోగించుకునే దిశగా సరికొత్త ముందడుగు వేసింది. ప్రభుత్వ సంక్షేమ పథకాలు, అభివృద్ధి కార్యక్రమాలను ప్రజల్లోకి విస్తృతంగా తీసుకెళ్లేందుకు సోషల్ మీడియా ఇన్‌ఫ్లుయెన్సర్ల ఎంపానెల్‌మెంట్ పాలసీని అధికారికంగా ఖరారు చేస్తూ రాష్ట్ర సాధారణ పరిపాలన శాఖ (GAD) ఉత్తర్వులు జారీ చేసింది. ఈ మేరకు జీవో ఎంఎస్ నంబర్ 197 (GO MS 197) ను విడుదల చేసింది.
ఈ పాలసీలో భాగంగా రాష్ట్రవ్యాప్తంగా సోషల్ మీడియా ఇన్‌ఫ్లుయెన్సర్ల గుర్తింపు, వారి వివరాల ధృవీకరణ మరియు ఎంపానెల్‌మెంట్ ప్రక్రియకు పక్కా మార్గదర్శకాలను ప్రభుత్వం నిర్దేశించింది. ఇందులో భాగంగా కేటగిరీ-A (Cat-A) పరిధిలోకి వచ్చే ఇన్‌ఫ్లుయెన్సర్లకు ఒక్కో రీల్‌కి రూ. 15,000 చొప్పున, నెలకు గరిష్టంగా రూ. 75,000 వరకు పారితోషికం అందించేలా నిబంధనలను పొందుపరిచారు. రాష్ట్రంలో అమలవుతున్న సంక్షేమ ఫలాలు, మౌలిక వసతుల కల్పన మరియు ప్రజోపయోగ అవగాహన కార్యక్రమాలను నేరుగా ప్రజల ముంగిటకు చేర్చి, ప్రభుత్వ కమ్యూనికేషన్ వ్యవస్థను మరింత బలోపేతం చేయడమే ఈ సరికొత్త విధానం యొక్క ప్రధాన లక్ష్యమని ఉత్తర్వుల్లో పేర్కొన్నారు.
