జన గళం ఆంధ్రప్రదేశ్ డెస్క్: ప్రజా సమస్యల పరిష్కారంలో నిర్లక్ష్యం వహిస్తూ, లంచాలు మరిగిన అవినీతి అధికారులపై ప్రజలు నేరుగా ఆదాయపు పన్ను శాఖకు (Income Tax Department), దర్యాప్తు సంస్థలకు ఫిర్యాదు చేయవచ్చని జాతీయ వినియోగదారుల హక్కుల పరిరక్షణ సమితి నేతలు పిలుపునిచ్చారు. ఆదాయానికి మించిన ఆస్తులు కూడబెట్టిన అధికారులపై ఆదాయపు పన్ను శాఖ ప్రత్యేక దృష్టి సారించిందని తెలిపారు.
ఉద్యోగంలో చేరిన సమయంలో సర్వీస్ రిజిస్టర్ (SR) లో చూపిన ఆస్తులు, ఆ తర్వాత కుటుంబ సభ్యులు, బినామీల పేర్లతో కొనుగోలు చేసిన ఆస్తుల వివరాలను ఆదాయపు పన్ను శాఖ సమగ్రంగా పరిశీలిస్తుందని, నిబంధనలకు విరుద్ధంగా ఆస్తులున్నట్లు తేలితే సోదాలు నిర్వహించి చట్టపరమైన చర్యలు తీసుకుంటుందని పేర్కొన్నారు. ప్రస్తుతం ప్రతి పౌరుడి వద్ద స్మార్ట్ఫోన్ అందుబాటులో ఉన్నందున, ప్రజా సమస్యలను గాలికొదిలేసిన అవినీతి అధికారులు, స్థానిక నాయకుల అక్రమాలపై ప్రజలు ఆన్లైన్ ద్వారా ఫిర్యాదు చేయవచ్చని సూచించారు. ఆదాయపు పన్ను శాఖతో పాటు ఈడీ (ED), ఐబీ (IB), విజిలెన్స్, ఏసీబీ (టోల్ ఫ్రీ నం: 1064) విభాగాలకు ఈ-మెయిల్ లేదా ఫ్యాక్స్ ద్వారా ఆధారాలతో ఫిర్యాదులు పంపవచ్చని స్పష్టం చేశారు. అవినీతిని అంతమొందించేందుకు మేధావులు, నిరుద్యోగ యువత, ప్రజలు ముందుకు రావాలని జాతీయ వినియోగదారుల హక్కుల పరిరక్షణ సమితి ఏపీ పబ్లిక్ రిలేషన్స్ రాష్ట్ర కార్యదర్శి డి. సురేష్, మండల సమాచార కేంద్రం ఇంచార్జ్, జిల్లా గౌరవాధ్యక్షులు ఎం. నర్సింగరావు పిలుపునిచ్చారు.
