జన గళం అమరావతి బ్యూరో: ఆంధ్రప్రదేశ్ రాష్ట్రంలో గ్రామాల సమగ్ర వికాసం, పల్లెల్లో మౌలిక సదుపాయాల కల్పనే ధ్యేయంగా కూటమి ప్రభుత్వం సరికొత్త చరిత్రకు శ్రీకారం చుట్టింది. గతంలో చేపట్టిన ‘పల్లె పండుగ’, ‘పల్లె పండుగ 2.0’ కార్యక్రమాలు సాధించిన అద్భుత విజయాలు, సత్ఫలితాల స్ఫూర్తితో.. ఇప్పుడు మరింత ప్రతిష్టాత్మకంగా ‘పల్లె పండుగ 3.0’కి రూపకల్పన చేశారు. గ్రామీణ రూపురేఖలను సమూలంగా మార్చేందుకు ఏకంగా రూ. 11,085 కోట్ల భారీ నిధులను కేటాయించారు.
ఈ బృహత్తర కార్యక్రమంలో భాగంగా గ్రామీణ రహదారులు, తాగునీరు, డ్రైనేజీ తదితర మౌలిక వసతుల కల్పనతో పాటు రైతు సంక్షేమం, పారిశుధ్య నిర్వహణ, ఉద్యానవన పంటల అభివృద్ధికి అత్యధిక ప్రాధాన్యత కల్పించనున్నారు. ఉప ముఖ్యమంత్రి, పంచాయతీరాజ్ మరియు గ్రామీణాభివృద్ధి శాఖల మంత్రి శ్రీ కొణిదెల పవన్ కళ్యాణ్ గారి పర్యవేక్షణలో అమలవుతున్న ఈ ప్రణాళిక పల్లె సీమల్లో నూతన ఉత్తేజాన్ని నింపుతోందని పార్టీ శ్రేణులు, ప్రజాప్రతినిధులు పేర్కొంటున్నారు. గ్రామీణ ఆర్థిక వ్యవస్థకు ఊతమిస్తూ, గ్రామ స్వరాజ్య సాధన దిశగా కూటమి ప్రభుత్వం వేస్తున్న ఈ అడుగులు ‘ఇది మంచి ప్రభుత్వం’ అన్న నినాదానికి నిదర్శనమని మచిలీపట్నం ఎంపీ వల్లభనేని బాలశౌరి తదితర ప్రముఖులు కొనియాడారు.
