జన గళం నెల్లూరు బ్యూరో: ఆంధ్రప్రదేశ్ ప్రభుత్వం ప్రతిష్టాత్మకంగా చేపట్టిన ‘పల్లె పండుగ 3.0’ బృహత్తర కార్యక్రమంలో పాల్గొనేందుకు ఉప ముఖ్యమంత్రివర్యులు, పంచాయతీరాజ్ మరియు గ్రామీణాభివృద్ధి శాఖల మంత్రి శ్రీ కొణిదెల పవన్ కళ్యాణ్ గారు ఉదయగిరి చేరుకున్నారు. హెలికాప్టర్ ద్వారా ప్రత్యేకంగా ఏర్పాటు చేసిన హెలిప్యాడ్ వద్దకు చేరుకున్న జనసేనానికి రాష్ట్ర మంత్రులు, స్థానిక శాసనసభ్యులు, జిల్లా ఉన్నతాధికారులు మరియు కూటమి నాయకులు అత్యంత ఘనంగా స్వాగతం పలికారు.
గ్రామీణ ప్రాంతాల సమగ్ర స్వరూపాన్ని మార్చే లక్ష్యంతో ప్రభుత్వం ప్రారంభించిన ‘పల్లె పండుగ 3.0’ కార్యక్రమం గ్రామీణ ప్రజల్లో నూతన ఉత్సాహాన్ని నింపుతోందని జనసేన పార్టీ ప్రోగ్రామ్స్ కోఆర్డినేటర్, అఖిల భారత చిరంజీవి యువత ప్రతినిధి కొట్టే వెంకటేశ్వరరావు పేర్కొన్నారు. గ్రామీణ మౌలిక వసతులు, రహదారులు, రైతు సంక్షేమం, తాగునీరు, పారిశుధ్య పనుల కోసం వేల కోట్ల రూపాయలను వెచ్చిస్తూ పవన్ కళ్యాణ్ గారు గ్రామాల పునర్నిర్మాణానికి నడుం బిగించారని నాయకులు కొనియాడారు. ఉప ముఖ్యమంత్రి రాకతో ఉదయగిరి పరిసర ప్రాంతాల్లో కోలాహలం నెలకొంది. ఈ కార్యక్రమంలో పలువురు కూటమి ప్రజాప్రతినిధులు, వివిధ శాఖల ఉన్నతాధికారులు, జనసేన, టీడీపీ, బీజేపీ నాయకులు, భారీ సంఖ్యలో ప్రజలు పాల్గొన్నారు.
