జన గళం ఆంధ్రప్రదేశ్ డెస్క్: బందరు పోర్టు పరిసర ప్రాంతాలు మరియు ప్రభుత్వ భూముల్లో జరుగుతున్న అనధికారిక మట్టి తవ్వకాలు, అక్రమ మైనింగ్ కార్యకలాపాలను పూర్తిగా అరికట్టేందుకు రెవెన్యూ, పోలీస్, మైనింగ్ మరియు ముడా శాఖల అధికారులతో కూడిన ప్రత్యేక టాస్క్ఫోర్స్ను ఏర్పాటు చేసినట్లు బందరు ఆర్డీఓ సాంబశివరావు వెల్లడించారు. మచిలీపట్నం పరిధిలోని పోర్టు రెండో దశ విస్తరణ కోసం ప్రభుత్వం సుమారు 1,400 ఎకరాల భూమిని కేటాయించిన నేపథ్యంలో, ఆ భూముల్లో ఎలాంటి అనుమతులు లేకుండా ఖనిజాలు లేదా మట్టిని తరలించే వారిపై కఠిన చర్యలు తీసుకునేందుకు ఈ నిర్ణయం తీసుకున్నట్లు ఆయన స్పష్టం చేశారు.
పోర్టు విస్తరణ భూముల్లో అక్రమ మైనింగ్ను నిరోధించేందుకు సంబంధిత శాఖల అధికారులు సంయుక్తంగా తనిఖీలు నిర్వహించి, పరిస్థితిని సమీక్షించారని ఆర్డీఓ తెలిపారు. అనుమానాస్పద కదలికలు మరియు మట్టి తరలించే వాహనాల రాకపోకలను పర్యవేక్షించేందుకు వ్యూహాత్మక ప్రాంతాల్లో సీసీ కెమెరాలను ఏర్పాటు చేస్తున్నట్లు వెల్లడించారు. నిబంధనలకు విరుద్ధంగా మైనింగ్ కార్యకలాపాలు నిర్వహించే వాహనాలను తక్షణమే సీజ్ చేయడంతో పాటు బాధ్యులపై చట్టపరమైన కఠిన చర్యలు తీసుకుంటామని హెచ్చరించారు.
ప్రభుత్వ భూములు మరియు పోర్టు అవసరాలకు కేటాయించిన స్థలాల్లో ఎక్కడైనా అక్రమ మైనింగ్ జరుగుతున్నట్లు గుర్తించినట్లయితే ప్రజలు వెంటనే అధికారులకు సమాచారం అందించాలని ఆర్డీఓ కోరారు. దీనికోసం మచిలీపట్నం ఆర్డీవో కార్యాలయ నెంబర్ 9849903962 కు ఫోన్ చేసి వివరాలు తెలపవచ్చని, ప్రజలకు అందుబాటులో ఉండేలా త్వరలోనే ప్రత్యేక సమాచార బోర్డులను ఏర్పాటు చేయనున్నట్లు పేర్కొన్నారు. ఈ నిరంతర పర్యవేక్షణ ద్వారా అక్రమ మైనింగ్కు పూర్తిగా అడ్డుకట్ట వేస్తామని, ఈ తనిఖీల్లో డీఎస్పీ, మైనింగ్ ఏడీ, తహసీల్దార్తో పాటు వివిధ శాఖల అధికారులు పాల్గొన్నారని తెలిపారు.
Slug: bandaru-port-illegal-mining-task-force-machilipatnam-rdo