, జన గళం నందిగామ డెస్క్: నందిగామ పట్టణంలోని ప్రాంతీయ రవాణా శాఖ (RTO) కార్యాలయంలో నిబంధనలు పూర్తిగా అటకెక్కాయి. ప్రభుత్వం ప్రజలకు వేగవంతమైన, పారదర్శకమైన ఆన్‌లైన్ సేవలు అందిస్తున్నామని చెబుతున్నప్పటికీ, క్షేత్రస్థాయిలో మాత్రం ఏజెంట్లు, దళారుల హవా యథేచ్ఛగా సాగుతోంది. కార్యాలయాల్లోకి మధ్యవర్తులు రాకూడదని ఉన్నతాధికారుల స్పష్టమైన ఆదేశాలు ఉన్నా, ఇక్కడ మాత్రం అధికారుల అండదండలతోనే దందా కొనసాగుతోందన్న తీవ్ర ఆరోపణలు వెల్లువెత్తుతున్నాయి.
ఒక సాధారణ వాహనదారుడు ఆన్‌లైన్ ద్వారా ఫీజు చెల్లించి లైసెన్స్, వాహన రిజిస్ట్రేషన్ లేదా ఫిట్‌నెస్ సర్టిఫికెట్ కోసం నేరుగా వెళితే రోజులు, వారాల తరబడి కాళ్లరిగేలా తిరగాల్సి వస్తోంది. సర్వర్ డౌన్, ఫైలు వెరిఫికేషన్ కాలేదంటూ రకరకాల కొర్రీలు పెడుతూ ప్రజలను ఇబ్బందులకు గురిచేస్తున్నారు. అదే ఏజెంట్ల ద్వారా అడిగినంత ముడుపులు ముట్టజెబితే మాత్రం ఎలాంటి ఆటంకాలు లేకుండా గంటల వ్యవధిలోనే పనులు పూర్తవుతుండటం గమనార్హం. ఏజెంట్లు నేరుగా అధికారుల చాంబర్లలోకి వెళ్లి పనులు చక్కబెట్టుకుంటున్న దృశ్యాలు నిత్యం కనిపిస్తున్నాయి. పారదర్శక పాలనకు తూట్లు పొడుస్తూ సామాన్యుడిని పీల్చి పిప్పిచేస్తున్న ఈ ముడుపుల వ్యవహారంపై రవాణా శాఖ ఉన్నతాధికారులు, జిల్లా కలెక్టర్ తక్షణమే స్పందించి ఆకస్మిక తనిఖీలు చేపట్టాలని, అక్రమార్కులపై కఠిన చర్యలు తీసుకోవాలని వాహనదారులు డిమాండ్ చేస్తున్నారు.
