జన గళం ఆధ్యాత్మిక డెస్క్: గుడివాడ పట్టణంలోని బంటుమిల్లి రోడ్డులో అత్యంత ప్రసిద్ధిగాంచిన చారిత్రక శ్రీ భీమేశ్వర స్వామి వారి దేవస్థాన నూతన ధర్మకర్తల కమిటీ ప్రమాణ స్వీకార కార్యక్రమం ఘనంగా నిర్వహించబడింది. గుడివాడ శాసనసభ్యులు వెనిగండ్ల రాము సమక్షంలో జరిగిన ఈ వేడుకలో నూతన ధర్మకర్తల కమిటీ చైర్మన్‌గా పట్టపు చినాతో పాటు ఇతర కమిటీ సభ్యులు అధికారికంగా ప్రమాణ స్వీకారం చేసి బాధ్యతలు చేపట్టారు. ఈ సందర్భంగా నూతనంగా బాధ్యతలు స్వీకరించిన చైర్మన్ మరియు సభ్యులను ఎమ్మెల్యే రాము, కూటమి నాయకులు, ఆలయ అధికారులు మరియు భక్తులు ఘనంగా అభినందించి శుభాకాంక్షలు తెలియజేశారు.
ఈ కార్యక్రమానికి విచ్చేసిన ఎమ్మెల్యే వెనిగండ్ల రాము ముందుగా శ్రీ భీమేశ్వర స్వామివారలను, అమ్మవార్లను దర్శించుకుని ప్రత్యేక పూజలు నిర్వహించి రాష్ట్రం సుభిక్షంగా ఉండాలని ప్రార్థించారు. అనంతరం ఏర్పాటు చేసిన అభినందన సభలో ఆయన మాట్లాడుతూ గుడివాడ పట్టణ ఆధ్యాత్మిక వైభవంలో ఈ ఆలయానికి ఎంతో విశిష్టమైన స్థానం ఉందన్నారు. నూతనంగా ఎన్నికైన కమిటీ సభ్యులు ఆలయ సంప్రదాయాలు, పవిత్రతకు భంగం కలగకుండా చూస్తూ ఆలయ సర్వతోముఖాభివృద్ధికి అంకితభావంతో కృషి చేయాలని సూచించారు. దాతలు, భక్తుల భాగస్వామ్యంతో ఆలయ వైభవాన్ని మరింత ఇనుమడింపజేసేలా వినూత్న కార్యక్రమాలను చేపట్టాలని పిలుపునిచ్చారు.
ఆలయానికి విచ్చేసే భక్తులకు ఎటువంటి అసౌకర్యం కలగకుండా మెరుగైన వసతులు కల్పించడంతో పాటు ఆలయ పరిసరాలను ఎల్లప్పుడూ పరిశుభ్రంగా, ఆహ్లాదకరంగా తీర్చిదిద్దేందుకు ప్రత్యేక ప్రాధాన్యం ఇవ్వాలని ఎమ్మెల్యే కోరారు. త్వరలో రానున్న శ్రీదేవి శరన్నవరాత్రి మహోత్సవ వేడుకలను అత్యంత భక్తిశ్రద్ధలతో, ఘనంగా నిర్వహించేలా ప్రతి ఒక్కరూ భాగస్వాములు కావాలని ఆకాంక్షించారు. ఈ ప్రమాణ స్వీకార కార్యక్రమంలో కృష్ణా జిల్లా టీడీపీ అధ్యక్షుడు వీరంకి గురుమూర్తి, గుడివాడ జనసేన ఇంచార్జ్ బూరగడ్డ శ్రీకాంత్, దేవదాయ శాఖ ఇన్స్పెక్టర్ వి. సుధాకర్, ఆలయ ఈవో కందుల గోపాలరావు, కూటమి నాయకులు మరియు పెద్ద సంఖ్యలో భక్తులు పాల్గొన్నారు.
Slug: gudivada-bheemeswara-swamy-temple-trustee-committee-swearing-in