రచన: జన గళం భక్తి/తిరుమల డెస్క్: తిరుమల శ్రీ వేంకటేశ్వర స్వామివారి వీఐపీ బ్రేక్ దర్శనం కోసం కేటాయించిన శ్రీవాణి (SRIVANI) ట్రస్ట్ టికెట్లకు సంబంధించి తిరుపతి విమానాశ్రయం (Airport Quota) ప్రస్తుత నిబంధనలు, మార్గదర్శకాలను టీటీడీ మరోసారి స్పష్టం చేసింది. తిరుపతి ఎయిర్‌పోర్ట్‌లో ఏర్పాటు చేసిన కౌంటర్లలో కేవలం అర్హులైన విమాన ప్రయాణికులకు మాత్రమే ఈ కోటా కింద దర్శన టికెట్లు జారీ చేస్తున్నారు.
విమానంలో ప్రయాణించిన వారు తమ చెల్లుబాటయ్యే ఒరిజినల్ బోర్డింగ్ పాస్‌తో పాటు ఆధార్ గుర్తింపు కార్డును తప్పనిసరిగా సమర్పించాల్సి ఉంటుంది. టికెట్ల లభ్యత (Subject to availability) ఆధారంగానే వీటిని కేటాయిస్తారు. కేవలం శ్రీవాణి దర్శన టికెట్ల కోసమే ఎయిర్‌పోర్టుకు నేరుగా రాకూడదని, బోర్డింగ్ పాస్ లేకుండా వచ్చే సాధారణ భక్తులకు ఈ కౌంటర్లలో టికెట్లు జారీ చేయడం జరగదని అధికారులు స్పష్టం చేశారు. విమాన ప్రయాణికులు కాని సాధారణ భక్తులు తిరుమలలోని ఆఫ్‌లైన్ కౌంటర్లు లేదా టీటీడీ అధికారిక వెబ్‌సైట్ ద్వారా మాత్రమే శ్రీవాణి ట్రస్ట్ టికెట్లను బుక్ చేసుకోవాలని విజ్ఞప్తి చేశారు.
