జన గళం ఆంధ్రప్రదేశ్ డెస్క్: సమాజ నిర్మాణంలో గురువుల పాత్ర అమూల్యమని, ఉపాధ్యాయులను గౌరవించుకోవడం మన సంస్కృతిలో భాగమని ఆంధ్రప్రదేశ్ ప్రభుత్వ హామీల కమిటీ చైర్మన్, కైకలూరు నియోజకవర్గ శాసనసభ్యులు డాక్టర్ కామినేని శ్రీనివాస్ పేర్కొన్నారు. అంతర్జాతీయ ఉపాధ్యాయుల దినోత్సవాన్ని పురస్కరించుకుని సోమవారం ముదినేపల్లి మండలం ముదినేపల్లిలోని మండల విద్యాశాఖాధికారి కార్యాలయంలో ప్రత్యేక కార్యక్రమం నిర్వహించారు. ఈ వేడుకకు ముఖ్య అతిథిగా విచ్చేసిన ఎమ్మెల్యే కామినేని శ్రీనివాస్, మండలంలోని పలువురు ఉపాధ్యాయులను ఘనంగా సత్కరించి వారికి అంతర్జాతీయ ఉపాధ్యాయ దినోత్సవ శుభాకాంక్షలు తెలియజేశారు.
ప్రతి గొప్ప వ్యక్తి వెనుక కచ్చితంగా ఒక గురువు హస్తం ఉంటుందని, పురాణ కాలం నుంచి కూడా మన దేశంలో గురువులకు అత్యున్నత స్థానం కల్పించామని ఎమ్మెల్యే గుర్తుచేశారు. అయితే నేటి సమాజంలో కొంతమంది గురువుల పట్ల వ్యవహరిస్తున్న తీరు తీవ్ర ఆవేదన కలిగిస్తోందని ఆయన ఆందోళన వ్యక్తం చేశారు. కొందరు గురువులను గౌరవించడం మరచిపోయి అవమానించడం, అవహేళన చేయడం, కొన్ని చోట్ల దాడులకు పాల్పడటం అత్యంత బాధాకరమని అన్నారు. ఉపాధ్యాయ వృత్తికి భంగం వాటిల్లేలా ప్రవర్తించే ధోరణులు మారాలని, గురువులను సముచిత రీతిలో గౌరవించుకోవాల్సిన బాధ్యత ప్రతి ఒక్కరిపై ఉందని స్పష్టం చేశారు.
ఇదే సందర్భంగా ఇటీవల డీఎస్సీ వ్యవహారంలో వైయస్సార్సీపీ అనుసరించిన తీరు సిగ్గుచేటని ఎమ్మెల్యే కామినేని శ్రీనివాస్ తీవ్రంగా మండిపడ్డారు. కేవలం రాజకీయ లబ్ది కోసమే ఉపాధ్యాయులను అవమానించడం సరైన పద్ధతి కాదని హితవు పలికారు. ఉపాధ్యాయుల సంక్షేమానికి, విద్యా వ్యవస్థ అభివృద్ధికి కూటమి ప్రభుత్వం ఎప్పుడూ కట్టుబడి ఉంటుందని భరోసా కల్పించారు. ఈ కార్యక్రమంలో నియోజకవర్గం టీడీపీ కన్వీనర్ కొత్తా నాగేంద్ర కుమార్, ఎన్డీయే నాయకులు, ప్రజాప్రతినిధులు, వివిధ శాఖల అధికారులు మరియు పెద్ద సంఖ్యలో ఉపాధ్యాయులు పాల్గొన్నారు.
Slug: kamineni-srinivas-teachers-day-celebrations-mudinepalli