జన గళం తాడేపల్లి బ్యూరో: రానున్న స్థానిక సంస్థల ఎన్నికల్లో వైఎస్సార్‌సీపీ సోషల్ మీడియా విభాగం అత్యంత కీలకమైన, క్రియాశీలకమైన బాధ్యతను నిర్వర్తించాలని పార్టీ స్టేట్ కోఆర్డినేటర్ శ్రీ సజ్జల రామకృష్ణారెడ్డి పిలుపునిచ్చారు. తాడేపల్లిలోని వైఎస్సార్ కాంగ్రెస్ పార్టీ కేంద్ర కార్యాలయంలో సోషల్ మీడియా రాష్ట్ర కమిటీ సభ్యులు, జిల్లా అధ్యక్షులతో నిర్వహించిన విస్తృత స్థాయి సమీక్షా సమావేశంలో ఆయన ముఖ్య అతిథిగా పాల్గొని దిశానిర్దేశం చేశారు. సోషల్ మీడియా విభాగం అంటే కేవలం డిజిటల్ పోస్టులు పెట్టే వ్యవస్థ మాత్రమే కాదని, పార్టీ సందేశాన్ని అత్యంత వేగంగా ప్రజల్లోకి చేరవేసే మహాశక్తిగా మారాలని స్పష్టం చేశారు. సాధారణ కార్యకర్తల కంటే భిన్నంగా కంటెంట్‌ను విస్తృతంగా ప్రజల్లోకి తీసుకెళ్లగలిగే ఆర్గనైజర్లుగా పనిచేయాలని, ప్రస్తుతం పార్టీ వ్యవస్థకు సోషల్ మీడియా శరీరంలో రక్తప్రసరణ లాంటి కీలక పాత్ర పోషిస్తోందని వివరించారు. రాబోయే స్థానిక సంస్థల సమరంలో నామినేషన్ల ఘట్టం నుంచి పోలింగ్, కౌంటింగ్ వరకు ఎక్కడ అక్రమాలు, అధికారుల దుర్వినియోగం, పోలీసుల జోక్యం, ప్రత్యర్థుల దౌర్జన్యాలు జరిగినా వాటిని విజువల్ ఎవిడెన్స్‌గా రికార్డు చేసి ప్రజల ముందుకు తీసుకురావడంతో పాటు ఎన్నికల సంఘం, న్యాయస్థానాల దృష్టికి తీసుకెళ్లాలని సూచించారు. ఈ సమావేశంలో పార్టీ ప్రధాన కార్యదర్శులు లేళ్ల అప్పిరెడ్డి, పూడి శ్రీహరి, సోషల్ మీడియా అధ్యక్షుడు దొడ్డా అంజిరెడ్డి, లీగల్ సెల్ వర్కింగ్ ప్రెసిడెంట్ సుదర్శన్ రెడ్డి తదితరులు పాల్గొన్నారు.
సోషల్ మీడియా పోస్టులకే పరిమితం కాదు.. పార్టీ సందేశాన్ని ప్రజల్లోకి తీసుకెళ్లే శక్తిగా మారాలి: వైఎస్సార్‌సీపీ స్టేట్ కోఆర్డినేటర్ సజ్జల రామకృష్ణారెడ్డి!
Slug: sajjala-ramakrishna-reddy-ysrcp-social-media-state-meeting-tadepalli-local-body-elections-guidelines
