జన గళం ఆంధ్రప్రదేశ్ డెస్క్: విజయవాడ నగర పాలక సంస్థ ఎన్నికల సమరంలో భాగంగా పశ్చిమ నియోజకవర్గంలో కూటమి మేయర్ అభ్యర్థి శ్రీ వంగవీటి రాధాకృష్ణ గారికి మద్దతుగా ప్రచారం హోరెత్తుతోంది. జనసేన పార్టీ నాయకులు అజయ్ వర్మ ఠాకూర్ గారి నేతృత్వంలో పశ్చిమ నియోజకవర్గ వ్యాప్తంగా ముమ్మరంగా సాగుతున్న ప్రచార పర్వానికి ప్రజల నుంచి విశేష స్పందన, బలమైన ఆత్మీయ భావోద్వేగం వ్యక్తమవుతోంది.
బడుగు, బలహీన వర్గాల ఆశాజ్యోతి, దివంగత శ్రీ వంగవీటి మోహన రంగా గారికి కృతజ్ఞతలు తెలుపుకొని, ఆయన రుణం తీర్చుకునే అవకాశం ఇప్పటివరకు పశ్చిమ నియోజకవర్గ ప్రజలకు రాలేదని, ఇప్పుడు ఆయన తనయుడు శ్రీ వంగవీటి రాధాకృష్ణ గారి రూపంలో ఓటు వేసి ఆ రుణం తీర్చుకుంటామని స్థానిక ఓటర్లు స్పష్టం చేస్తున్నారు. వంగవీటి రాధాకృష్ణ గారు మేయర్ అభ్యర్థిగా బరిలో నిలవడం విజయవాడ ప్రజల అదృష్టమని, నగర సమగ్ర అభివృద్ధి, పారదర్శక పాలన కేవలం కూటమితోనే సాధ్యమని ప్రజలు ముక్తకంఠంతో మద్దతు పలుకుతున్నారు.
రంగా గారి ఆశయాల సాధనకు, పేద ప్రజల సంక్షేమానికి కట్టుబడి పనిచేసే వంగవీటి రాధాకృష్ణ గారిని భారీ మెజార్టీతో గెలిపించి మేయర్ పీఠంపై కూర్చోబెట్టేందుకు ప్రతి ఒక్కరూ సైనికుల్లా పనిచేయాలని జనసేన శ్రేణులు పిలుపునిచ్చాయి. ఈ కార్యక్రమంలో జనసేన పార్టీ నాయకులు, కార్యకర్తలు, వీర మహిళలు, రంగా గారి అభిమానులు పెద్ద సంఖ్యలో పాల్గొన్నారు.