జన గళం విజయవాడ డెస్క్: విజయవాడ నగర పాలక సంస్థ ఎన్నికల పోలింగ్‌కు గడువు సమీపిస్తున్న వేళ నగరంలో ఓటరు స్లిప్పుల పంపిణీ ప్రక్రియపై తీవ్ర ఆందోళన వ్యక్తమవుతోంది. పోలింగ్‌కు కొన్ని గంటల సమయం మాత్రమే మిగిలి ఉన్నప్పటికీ క్షేత్రస్థాయిలో ఇంకా ఓటరు స్లిప్పులు పూర్తిస్థాయిలో పంపిణీ కాకపోవడంపై ఎన్నికల బరిలో ఉన్న స్వతంత్ర అభ్యర్థి, మాజీ ఐపీఎస్ అధికారి ఏబీ వెంకటేశ్వరరావు రాష్ట్ర ఎన్నికల సంఘం (SEC) దృష్టికి తీసుకెళ్లారు.
ఈ మేరకు ఎన్నికల సంఘానికి అధికారికంగా లేఖ రాసిన ఆయన, యంత్రాంగం వైఫల్యంపై తీవ్ర అసంతృప్తి వ్యక్తం చేశారు.
లేఖలోని కీలక అంశాలు:
- సిబ్బంది కొరత – నిర్లక్ష్యం: క్షేత్రస్థాయిలో ప్రతి గడపకూ ఓటరు స్లిప్పులు చేరవేయాల్సిన సిబ్బంది పెన్షన్ల పంపిణీ విధుల్లో నిమగ్నమై ఉన్నారని, దీనివల్ల ఓటరు స్లిప్పుల పంపిణీ తీవ్ర జాప్యం జరుగుతోందని పేర్కొన్నారు.
- ఎన్నికల సంఘానికి విజ్ఞప్తి: రేపే పోలింగ్ జరగనున్న నేపథ్యంలో అర్హులైన ప్రతి ఓటరుకు తక్షణమే ఓటరు స్లిప్పులు అందేలా యుద్ధప్రాతిపదికన చర్యలు చేపట్టాలని ఎన్నికల సంఘాన్ని కోరారు.
- ఓటింగ్ శాతంపై ప్రభావం: ఓటరు స్లిప్పులు సకాలంలో అందకపోతే ఓటింగ్ శాతం తగ్గి ప్రజాస్వామ్య ప్రక్రియ దెబ్బతినే ప్రమాదం ఉందని ఆందోళన వ్యక్తం చేశారు.
పోలింగ్ సమయానికి ముందుగానే ప్రతి ఒక్కరికీ ఓటరు స్లిప్పులు అందేలా అధికార యంత్రాంగం ప్రత్యేక చర్యలు తీసుకోవాలని నగరవాసులు కోరుతున్నారు.