జన గళం పెడన బ్యూరో: కృష్ణా జిల్లా పెడన మున్సిపాలిటీలో రెండో విడత పట్టణ స్థానిక సంస్థల ఎన్నికల పోలింగ్ ప్రక్రియ అత్యంత ఉత్సాహపూరిత, ప్రశాంత వాతావరణంలో విజయవంతంగా ముగిసింది. కృష్ణా జిల్లా సమాచార పౌర సంబంధాల అధికారి (DIPRO, మచిలీపట్నం) అధికారికంగా విడుదల చేసిన తుది నివేదిక ప్రకారం, ఆదివారం సాయంత్రం 5:00 గంటల సమయానికి పెడన మున్సిపాలిటీ వ్యాప్తంగా రికార్డు స్థాయిలో 79.42 శాతం పోలింగ్ నమోదైంది.
పురపాలక సంఘ పరిధిలోని 28 వార్డుల్లో ఓటర్లు పోలింగ్ కేంద్రాలకు భారీగా పోటెత్తారు. ముఖ్యంగా పురుషుల కంటే మహిళా ఓటర్లే అత్యధిక సంఖ్యలో తరలివచ్చి ప్రజాస్వామ్య హక్కును వినియోగించుకోవడం ఈ ఎన్నికల్లో విశేషంగా నిలిచింది.
తుది పోలింగ్ అధికారిక గణాంకాలు:
- మొత్తం ఓటర్లు: 25,373 (పురుషులు: 12,212 | మహిళలు: 13,161)
- పోలైన మొత్తం ఓట్లు: 20,151 (79.42%)
- ఓటు వేసిన పురుషులు: 9,752 మంది
- ఓటు వేసిన మహిళలు: 10,399 మంది (పురుషుల కంటే 647 ఓట్లు అధికం)
- ఇతరులు: 0
ఉదయం నుంచే పోలింగ్ కేంద్రాల వద్ద ఓటర్లు బారులు తీరగా, మధ్యాహ్నం 3 గంటలకు 65.79 శాతంగా ఉన్న ఓటింగ్.. చివరి రెండు గంటల్లో భారీగా పుంజుకుని దాదాపు 80 శాతానికి చేరువ కావడం గమనార్హం. శాంతిభద్రతల సమస్యలు తలెత్తకుండా పోలీసు యంత్రాంగం పటిష్ట బందోబస్తు నిర్వహించడంతో పోలింగ్ ప్రశాంతంగా ముగిసి బ్యాలెట్ బాక్సులు స్ట్రాంగ్ రూమ్‌లకు తరలించబడ్డాయి.