జన గళం పొలిటికల్ డెస్క్: విజయవాడ నగర పాలక సంస్థ (VMC) స్థానిక సమరం ముగిసి ఫలితాల కోసం ఉత్కంఠగా ఎదురుచూస్తున్న తరుణంలో, ఎన్టీఆర్ జిల్లా ఇంటెలిజెన్స్ విభాగం (DSP, INT, NTR VJA ZONE) రూపొందించిన సమగ్ర రహస్య నివేదిక రాజకీయ వర్గాల్లో తీవ్ర సంచలనం రేపుతోంది. మొత్తం 86 డివిజన్లలో నామినేషన్ల ఉపసంహరణ అనంతర తుది బరి (Form 7-D) మరియు క్షేత్రస్థాయి సమీకరణాల ఆధారంగా ఎన్డీఏ కూటమి (TDP-JSP-BJP) బలాబలాలను అంచనా వేస్తూ నిఘా వర్గాలు ఈ నివేదికను సిద్ధం చేశాయి.
ఈ నివేదిక ప్రకారం నగరంలోని 86 డివిజన్లలో కూటమి అభ్యర్థులు స్పష్టమైన ఆధిక్యంతో మేయర్ పీఠాన్ని సునాయాసంగా కైవసం చేసుకునే దిశగా దూసుకెళ్తున్నట్లు తేలింది.
నివేదిక ముఖ్యాంశాలు – డివిజన్ల వర్గీకరణ (మొత్తం: 86 డివిజన్లు)
- స్పష్టమైన విజయావకాశాలు (FAIR – గ్రీన్): 50 డివిజన్లు (58.1%) – కూటమి అభ్యర్థులకు తిరుగులేని విజయం లభించే అవకాశమున్న స్థానాలు.
- తీవ్ర పోటీ / హోరాహోరీ (KEEN – రెడ్): 24 డివిజన్లు (27.9%) – కూటమి మరియు ప్రత్యర్థుల మధ్య స్వల్ప తేడాతో తీవ్ర పోటీ నెలకొన్న స్థానాలు.
- ప్రతికూల పరిస్థితులు (BLEAK – బ్లాక్): 11 డివిజన్లు (12.8%) – స్థానిక సమీకరణాలు, రెబల్స్ లేదా వైకాపా బలమైన అభ్యర్థుల వల్ల కూటమికి ప్రతికూలంగా మారిన స్థానాలు.
- ఏకగ్రీవం (UNANIMOUS – గ్రే): 1 డివిజన్ (డివిజన్ 64) – 64వ డివిజన్‌లో కూటమి అభ్యర్థి ఇప్పటికే ఏకగ్రీవంగా ఎన్నికయ్యారు.
ఫలితాలను ప్రభావితం చేసే అంశాలు – ఇంటెలిజెన్స్ విశ్లేషణ
ఇంటెలిజెన్స్ విభాగం డివిజన్ల వారీగా పరిస్థితులను 9 ప్రధాన అంశాలుగా విభజించింది:
- కూటమి సంప్రదాయ ఓటు బ్యాంక్ & ప్రభుత్వ సంక్షేమం (48 డివిజన్లు): నగరంలోని అత్యధిక డివిజన్లలో టీడీపీ-జనసేన సంప్రదాయ ఓటు బ్యాంకు, సంక్షేమ పథకాల అనుకూలతతో కూటమి ఏకపక్షంగా విజయం సాధించనుంది (డివిజన్లు: 3, 7, 9, 10, 11, 12, 13, 15, 16, 17, 18, 19, 21, 22, 23, 24, 27, 29, 35, 37, 39, 43, 44, 45, 46, 47, 48, 50, 52, 54, 60, 62, 63, 65, 67, 68, 70, 71, 72, 73, 75, 76, 78, 80, 81, 83, 84, 85).
- రెబల్ అభ్యర్థుల ఓట్ల చీలిక ప్రభావం (12 డివిజన్లు): టికెట్లు దక్కక బరిలో నిలిచిన రెబల్స్ వల్ల 12 చోట్ల ప్రభావం పడింది. ఇందులో టీడీపీ రెబల్స్ (1, 33, 36, 41, 51, 69, 86 డివిజన్లు), జనసేన రెబల్స్ (20, 42, 49 డివిజన్లు), బీజేపీ రెబల్ (28వ డివిజన్), టీడీపీ-జనసేన ఉమ్మడి రెబల్స్ ఉన్న 40వ డివిజన్లలో ఓట్లు చీలిపోతున్నాయి. ఇందులో 8 చోట్ల తీవ్ర పోటీ ఉండగా, 3 చోట్ల కూటమికి నష్టం జరిగే అవకాశముంది.
- ఎస్సీ జనాభా ప్రాబల్యం (8 డివిజన్లు): ఎస్సీ మాదిగ ఓటర్లు అధికంగా ఉన్న 4, 6, 8 డివిజన్లతో పాటు 53, 56, 58, 61, 77 డివిజన్లలో పోరు హోరాహోరీగా మారింది. 58లో వైకాపా ధనిక అభ్యర్థి ఉండగా, 77లో కూటమి బలహీన అభ్యర్థి పోటీలో ఉన్నారు.
- కూటమి బలహీన అభ్యర్థులు (5 డివిజన్లు): 5, 14, 25, 31, 74 డివిజన్లలో కూటమి అభ్యర్థులు ప్రత్యర్థుల కంటే బలహీనంగా ఉన్నట్లు గుర్తించారు.
- కూటమిలో సమన్వయ లోపం (5 డివిజన్లు): 26, 59, 66, 79, 82 డివిజన్లలో టీడీపీ-జనసేన నేతల మధ్య సమన్వయం కొరవడి తీవ్ర పోటీ నెలకొంది. ప్రత్యేకించి 26వ డివిజన్‌లో స్థానిక టీడీపీ నేతల ఆశావహ దృక్పథం, జనసేన అభ్యర్థి ఆర్థిక ఇబ్బందులు ప్రభావం చూపాయి.
- వైఎస్సార్‌సీపీ బలమైన స్థానాలు (3 డివిజన్లు): డివిజన్ 2 (వైకాపా బేస్), 55 (వైకాపా ధనిక అభ్యర్థి), 57లలో వైకాపా తీవ్రమైన పోటీనిస్తోంది.
- మైనారిటీ / సామాజికవర్గ ప్రాబల్యం (3 డివిజన్లు): ముస్లిం ఓటర్లు అధికంగా ఉన్న 32వ డివిజన్, రెడ్డి సామాజికవర్గం ఎక్కువగా ఉన్న 34, 38 డివిజన్లలో కూటమి గట్టి సవాలును ఎదుర్కొంటోంది.
- సీపీఎం ప్రభావం (1 డివిజన్): 30వ డివిజన్‌లో సీపీఎం అభ్యర్థి బరిలో ఉండటం వల్ల ఓట్లు చీలి పోటీ తీవ్రతరమైంది.