జన గళం పెనుగంచిప్రోలు/జగ్గయ్యపేట బ్యూరో: నిరంతరం ప్రజాసేవలో ఉండే ప్రజాప్రతినిధులు ఆపదలో ఉన్నవారిని ఆదుకోవడంలోనూ ముందుంటారని జగ్గయ్యపేట శాసనసభ్యులు శ్రీ శ్రీరామ్ రాజగోపాల్ (తాతయ్య) గారు మరోసారి నిరూపించారు. ఎన్నికల ప్రచారంలో అలసిపోయిన వేళ కూడా రాత్రి వేళ రోడ్డు ప్రమాదంలో గాయపడి పడిఉన్న వృద్ధ దంపతులను స్వయంగా తన వాహనంలోనే ఆసుపత్రికి తరలించి అత్యవసర వైద్యం అందించి తన ఉదారతను, మానవత్వాన్ని చాటుకున్నారు.
ఘటన వివరాలు:
జగ్గయ్యపేట నియోజకవర్గ పరిధిలోని పెనుగంచిప్రోలు మండలం శివాపురం గ్రామంలో జెడ్పీటీసీ, ఎంపీటీసీ ఎన్నికల ప్రచారాన్ని ముగించుకుని రాత్రి సమయంలో ఎమ్మెల్యే శ్రీరామ్ రాజగోపాల్ తాతయ్య తిరుగు ప్రయాణమయ్యారు. మార్గమధ్యంలో అనిగండ్లపాడు – శివాపురం రహదారిలో తీవ్ర గాయాలతో రోడ్డు పక్కన పడి ఉన్న వృద్ధ దంపతులు ఎమ్మెల్యే దృష్టిలో పడ్డారు. చీకటి సమయం అయినప్పటికీ ఏమాత్రం సంకోచించకుండా వెంటనే కాన్వాయ్‌ను ఆపించిన ఎమ్మెల్యే.. క్షతగాత్రుల వద్దకు వెళ్లి వారి పరిస్థితిని పరిశీలించారు.
- సొంత కారులోనే ఆసుపత్రికి తరలింపు: ఆలస్యం చేయకుండా క్షతగాత్రులను వెంటనే తన సొంత కారులోనే ఎక్కించుకుని పెనుగంచిప్రోలు ప్రభుత్వ ఆసుపత్రికి తరలించారు. స్వయంగా దగ్గరుండి వారికి ప్రథమ చికిత్స చేయించారు.
- బాధితుల వివరాలు: ఎమ్మెల్యే వెంట ఉన్న శివాపురం గ్రామ జనసేన నాయకుడు లగడపాటి శంకర్ బాధితులను గుర్తించారు. వారు శివాపురం గ్రామానికి చెందిన ఇంజం వెంకయ్య, ఆయన భార్య మహాలక్ష్మమ్మగా తెలిపారు. వీరు టీవీఎస్ ద్విచక్ర వాహనంపై పెనుగంచిప్రోలు నుంచి శివాపురం వస్తుండగా గుర్తుతెలియని వాహనం ఢీకొట్టి ఆగకుండా వెళ్లిపోయిందని బాధితులు తెలిపారు.
- మెరుగైన వైద్యానికి ఆదేశం: ప్రాథమిక చికిత్స అనంతరం వృద్ధ దంపతులకు ఎలాంటి ప్రాణాపాయం లేకుండా మెరుగైన వైద్యం అందించేందుకు జగ్గయ్యపేట ప్రభుత్వాసుపత్రికి తరలించాలని ఆసుపత్రి సిబ్బందికి ఎమ్మెల్యే తాతయ్య ఆదేశాలు జారీ చేశారు.
ఈ కార్యక్రమంలో ఎమ్మెల్యే వెంట పెనుగంచిప్రోలు గ్రామ టీడీపీ అధ్యక్షులు కొత్తపల్లి సతీష్ కుమార్, స్థానిక జనసేన, టీడీపీ శ్రేణులు ఉన్నారు. ఆపద సమయంలో దేవుడిలా వచ్చి తమను కాపాడిన ఎమ్మెల్యే తాతయ్యకు బాధితులు, గ్రామస్తులు చేతులెత్తి కృతజ్ఞతలు తెలిపారు.