రచన: జన గళం విజయవాడ డెస్క్: జాతిపిత మహాత్మా గాంధీ జయంతిని పురస్కరించుకుని ఎన్టీఆర్ జిల్లా జనసేన పార్టీ కార్యాలయంలో బాపూజీ వేడుకలను అత్యంత భక్తిశ్రద్ధలతో ఘనంగా నిర్వహించారు. ఈ సందర్భంగా పార్టీ కార్యాలయంలో ఏర్పాటు చేసిన మహాత్మా గాంధీజీ చిత్రపటానికి ఎన్టీఆర్ జిల్లా జనసేన నాయకులు పూలమాలలు వేసి ఘనంగా నివాళులర్పించారు. దేశ స్వాతంత్ర్య సంగ్రామంలో సత్యం, అహింసా మార్గాల ద్వారా బ్రిటీష్ పాలనను ఎదిరించి స్వరాజ్యం సాధించిన బాపూజీ త్యాగాలను, ఆయన అందించిన నిస్వార్థ సేవలను పార్టీ శ్రేణులు స్మరించుకున్నాయి.
ఈ సందర్భంగా వక్తలు మాట్లాడుతూ.. మహాత్మా గాంధీ చూపిన శాంతి, అహింస, స్వచ్ఛత, గ్రామ స్వరాజ్యం వంటి ఆదర్శాలే దేశ ప్రగతికి అసలైన దిక్సూచి అని పేర్కొన్నారు. సమాజంలో మార్పు మన నుంచే మొదలుకావాలన్న బాపూజీ సందేశాన్ని ప్రతి ఒక్కరూ నిత్య జీవితంలో ఆచరణలో పెట్టాలని పిలుపునిచ్చారు. గాంధేయ సిద్ధాంతాలకు అనుగుణంగా, సమాజ శ్రేయస్సు మరియు ప్రజా సమస్యల పరిష్కారమే ధ్యేయంగా ఉప ముఖ్యమంత్రి, జనసేన అధినేత పవన్ కళ్యాణ్ నాయకత్వంలో పార్టీ ముందుకు సాగుతోందని స్పష్టం చేశారు. ఈ కార్యక్రమంలో ఎన్టీఆర్ జిల్లా జనసేన పార్టీ ముఖ్య నాయకులు, కార్యకర్తలు, వీర మహిళలు పెద్ద సంఖ్యలో పాల్గొని బాపూజీకి శ్రద్ధాంజలి ఘటించారు.