జన గళం ఆంధ్రప్రదేశ్ డెస్క్: విశాఖపట్నంలోని అడవివరం–ముదసలోవ ప్రాంతంలో ప్రతిపాదించిన భారీ హైపర్స్కేల్ ఏఐ డేటా సెంటర్ ప్రాజెక్టుకు సంబంధించి ప్రభుత్వాలు మరియు సంబంధిత సంస్థల తీరుపై జల బిరాదరి జాతీయ కన్వీనర్ బొలిశెట్టి సత్యనారాయణ ఆంధ్రప్రదేశ్ హైకోర్టులో సమగ్ర రీజాయిండర్ అఫిడవిట్ దాఖలు చేశారు. అదానీ–గూగుల్ జాయింట్ వెంచర్ ఆధ్వర్యంలో నిర్మ తలపెట్టిన ఈ ప్రాజెక్టు విషయంలో చట్టపరమైన నిబంధనలు, పర్యావరణ పరిరక్షణ చట్టాలు మరియు దేవాదాయ శాఖ భూముల కేటాయింపు నిబంధనలను యథేచ్ఛగా తుంగలో తొక్కుతున్నారని ఆయన హైకోర్టు దృష్టికి తీసుకువెట్టారు. తాము ఎప్పుడూ డేటా సెంటర్ల ఏర్పాటుకు వ్యతిరేకం కాదని, కానీ విశాఖపట్నం మరియు రాష్ట్ర ప్రజల జీవించే హక్కును, పర్యావరణాన్ని కాపాడటానికి చట్టాల కఠినమైన అమలు మాత్రమే కోరుతున్నామని ఆయన స్పష్టం చేశారు.
ఈ ప్రాజెక్టు కోసం శ్రీ వరాహ లక్ష్మీనరసింహ స్వామి దేవస్థానానికి చెందిన సుమారు నూట అరువై ఎకరాల భూమిని అడవివరం సర్వే నెంబర్ ఇరవై ఐదులో నూట యాభై మూడు ఎకరాలు, ముదసలోవ సర్వే నెంబర్ ఇరవై ఆరులో ఏడు ఎకరాలు కేటాయించడంలో నిబంధనల ఉల్లంఘన జరిగిందని పిటిషనర్ అఫిడవిట్లో పేర్కొన్నారు. ప్రభుత్వ ఉత్తర్వుల ప్రకారం ముప్పై సంవత్సరాల లీజుకు కేటాయించినప్పటికీ, కేవలం పదకొండు సంవత్సరాల లీజు మాత్రమేనని ప్రభుత్వం తప్పుడు వాదనలు చేస్తూ వస్తోందని ఆరోపించారు. రిజిస్ట్రేషన్ చట్టం 1908 సెక్షన్ 17 మరియు బదిలీ ఆస్తుల చట్టం 1882 సెక్షన్ 107 ప్రకారం ఎలాంటి రిజిస్టర్డ్ లీజు లేదా సబ్-లీజు డీడ్ లేకుండానే ముందస్తు స్వాధీనం ఇవ్వడం పూర్తిగా చట్టవిరుద్ధమని ఆయన విమర్శించారు.
ఈ ప్రాజెక్టు మూడు వేర్వేరు ప్రాంతాలలో విస్తరించి ఉండటంతో కేటగిరీ-ఏ ప్రాజెక్టు కింద కేంద్ర ప్రభుత్వం చేత మదింపు చేయబడాలని, అయితే ప్రాజెక్ట్ నివేదికలలో నీరు మరియు విద్యుత్ వినియోగానికి సంబంధించిన పూర్తి వివరాలను గోప్యంగా ఉంచారని అఫిడవిట్లో ఎత్తిచూపారు. గౌరవ హైకోర్టు స్పష్టమైన ఆదేశాలు జారీ చేసినప్పటికీ, ప్రాజెక్ట్ సైట్లో చెట్ల నరికివేత మరియు నిర్మాణ పనులు నిబంధనలకు విరుద్ధంగా యథేచ్ఛగా కొనసాగుతున్నాయని ఆందోళన వ్యక్తం చేశారు. పెండింగ్లో ఉన్న మధ్యంతర దరఖాస్తుపై అత్యవసర ఉత్తర్వులు జారీ చేసి, నూట అరువై ఎకరాల దేవాదాయ భూమి విషయంలో యథాతథ స్థితిని కొనసాగించాలని కోర్టును కోరామని, రాబోయే అక్టోబర్ ఐదవ తేదీన జరిగే విచారణలో ఈ అంశాలపై విస్తృత వాదనలు జరగనున్నాయని బొలిశెట్టి సత్యనారాయణ తెలిపారు.
Slug: bolisetty-satyanarayana-files-affidavit-ap-high-court-vizag-data-center