జన గళం ఆంధ్రప్రదేశ్ డెస్క్: ఏలూరు జిల్లా జంగారెడ్డిగూడెం మండలం నాగులగూడెం గ్రామంలో వైయస్సార్ కాంగ్రెస్ పార్టీకి గట్టి ఎదురుదెబ్బ తగిలింది. దశాబ్దాలుగా రోడ్డు సౌకర్యం లేక తీవ్ర ఇబ్బందులు పడుతున్న గ్రామస్తుల సమస్యను చింతలపూడి నియోజకవర్గ శాసనసభ్యులు సొంగ రోషన్ కుమార్ దృష్టికి తీసుకువెళ్లగా, ఆయన వెంటనే స్పందించి పరిష్కారానికి చర్యలు తీసుకోవడం పట్ల గ్రామస్థులు హర్షం వ్యక్తం చేస్తున్నారు. ఎమ్మెల్యే చొరవతో గ్రామానికి త్వరలో పక్కా రోడ్డు సౌకర్యం అందనుండటంతో స్థానికులలో సర్వత్రా హర్షాతిరేకాలు వ్యక్తమవుతున్నాయి. ప్రజా సంక్షేమమే ధ్యేయంగా కూటమి ప్రభుత్వం చేస్తున్న అభివృద్ధి కార్యక్రమాలకు ఆకర్షితులై ఆ గ్రామ రాజకీయ సమీకరణాలు ఒక్కసారిగా మారిపోయాయి.
స్థానిక శాసనసభ్యుల అభివృద్ధే లక్ష్యంగా సాగుతున్న పాలనా విధానం మరియు చేపడుతున్న సంక్షేమ కార్యక్రమాలకు ఆకర్షితులై నాగులగూడెం గ్రామానికి చెందిన పలువురు ప్రముఖులు అధికార తెలుగుదేశం పార్టీలోకి భారీ ఎత్తున చేరారు. మాజీ సర్పంచ్ పొద్దుటూరి వెంకటేష్, ఐదవ వార్డు నాయకులు పొద్దుటూరి ఇన్ బాబుతో పాటు పొద్దుటూరి గాంధీ, బత్తుల పవన్, దాసరి కేసు రావు, చిలక నాగేశ్వరరావు, పొంగులేటి దుర్గారెడ్డి, జీలుగు రాంబాబు, ఖండేలి సీతయ్య, గరికి శ్రీను, లాగు వీరయ్య, తానికి రాజు, పొంగులేటి వెంకటరెడ్డి తదితరులతో కూడిన సుమారు ముప్పై రెండు మంది వైయస్సార్‌సీపీ నాయకులు మరియు కార్యకర్తలు ఆ పార్టీని వీడారు. వీరంతా చింతలపూడి నియోజకవర్గ శాసనసభ్యులు సొంగ రోషన్ కుమార్ సమక్షంలో అధికారికంగా తెలుగుదేశం పార్టీలో చేరారు.
ఈ సందర్భంగా కొత్తగా పార్టీలోకి చేరిన నాయకులకు ఎమ్మెల్యే సొంగ రోషన్ కుమార్ సాదరంగా ఆహ్వానించి పార్టీ కండువాలు కప్పారు. గ్రామాల అభివృద్ధే ధ్యేయంగా అందరూ సమన్వయంతో ముందుకు సాగాలని, ప్రజల సమస్యల పరిష్కారానికి నిరంతరం శ్రమించాలని ఆయన పిలుపునిచ్చారు. దశాబ్దాల సమస్య అయిన రోడ్డు మార్గాన్ని త్వరలోనే పూర్తిస్థాయిలో అందుబాటులోకి తెస్తామని హామీ ఇవ్వడంతో గ్రామ ప్రజలు మరియు పార్టీ శ్రేణులు ఉత్సాహం ప్రదర్శిస్తున్నాయి. నాయకుల చేరికతో నియోజకవర్గంలో పార్టీ మరింత బలపడిందని, రాబోయే రోజుల్లో మరిన్ని అభివృద్ధి కార్యక్రమాలు చేపట్టి గ్రామీణ ప్రాంతాలను అన్ని రంగాల్లోనూ అగ్రగామిగా నిలుపుతామని స్థానిక నాయకులు ధీమా వ్యక్తం చేస్తున్నారు.
Slug: chintalapudi-nagulagudem-ysrcp-leaders-join-tdp-mla-roshan-kumar