జన గళం ఆంధ్రప్రదేశ్ డెస్క్: కోరుకొల్లు వ్యవసాయ పరపతి సంఘం పరిపాలనలో అనూహ్య పరిణామాలు చోటుచేసుకుని తీవ్ర వివాదానికి దారితీశాయి. పరపతి సంఘం చైర్మన్గా సుబ్రహ్మణ్యం బాధ్యతలు నిర్వహిస్తుండగా, అక్కడ పనిచేస్తున్న ఉద్యోగుల సర్వీసు విషయమై కొద్దిరోజులుగా అంతర్గత లొల్లి నడుస్తోంది. సంఘంలో సెక్రటరీగా రాంబాబుతో పాటు ఇరవై సంవత్సరాలుగా వికలాంగ కోటాలో ఉద్యోగం చేస్తూ బ్యాంకుకు సేవలందిస్తున్న పార్వతి అనే మహిళా ఉద్యోగినిని తొలగించాలంటూ కొందరు ప్రతిపాదనలు తెరపైకి తెచ్చారు. ఆమె స్థానికం కాదనే కారణం చూపుతూ బయటికి వెళ్లి పనిచేయలేరని, కాబట్టి వెంటనే తొలగించాలంటూ కొద్దిమంది వ్యక్తులు చైర్మన్పై తీవ్రస్థాయిలో ఒత్తిడి తెచ్చినట్లు సమాచారం. అయితే ఈ అంశం తన పరిధిలోకి రాదని, నిబంధనలకు విరుద్ధంగా ఏకపక్షంగా నిర్ణయం తీసుకుంటే భవిష్యత్తులో ఇబ్బందులు ఎదురవుతాయని చైర్మన్ స్పష్టం చేసినట్లు తెలుస్తోంది.
బ్యాంకు కష్టకాలంలో ఉన్నప్పుడు సుదీర్ఘకాలంగా సేవలందించి సంస్థను కాపాడుకుంటూ వచ్చిన ఉద్యోగిని పట్ల కొద్దికాలంగా వ్యక్తమవుతున్న వ్యతిరేకతపై స్థానికంగా విమర్శలు వ్యక్తమవుతున్నాయి. అందరూ స్థానికంగా ఉండే గ్రామవాసులే అయినప్పటికీ, ఇరవై ఏళ్లపాటు సేవలు అందించిన వికలాంగురాలైన ఉద్యోగినిని ఇప్పుడు జీతం భారం లేదా ఇతర కారణాల పేరుతో సాగనంపాలని చూడటం సరైన పద్ధతి కాదని పలువురు అభిప్రాయపడుతున్నారు. గతంలో ఇదే సంస్థలో పనిచేసిన వారి పీఎఫ్ నిధుల నిలుపుదల వ్యవహారం కూడా తెరపైకి రావడంతో పరపతి సంఘం పాలనా తీరుపై అనేక అనుమానాలు వ్యక్తమవుతున్నాయి. సహకార సంఘం నిబంధనలకు విరుద్ధంగా కొందరు బయటి వ్యక్తులు చక్రం తిప్పుతూ సంస్థ వ్యవహారాలను తమ గుప్పిట్లోకి తీసుకోవాలని ప్రయత్నిస్తున్నారనే ఆరోపణలు బలంగా వినిపిస్తున్నాయి.
సహకార సంఘాల చట్టం ప్రకారం చైర్మన్ మరియు పాలకవర్గం స్వయంగా బాధ్యతలు నిర్వర్తించాల్సి ఉండగా, బాధ్యతగల పదవుల్లో ఉన్న వారిని పక్కనపెట్టి బయటి వ్యక్తులు పరిపాలనను నడిపించడం పట్ల సర్వత్రా ఆందోళన వ్యక్తమవుతోంది. సంస్థలో సుదీర్ఘకాలం పనిచేసిన సిబ్బందికి రక్షణ కల్పించాల్సిందిపోయి ఇలా కక్షసాధింపు చర్యలకు పాల్పడటం వల్ల వ్యవస్థ పట్ల నమ్మకం సడలిపోతుందని సభ్యులు ఆవేదన వ్యక్తం చేస్తున్నారు. తక్షణమే ఈ వివాదంపై ఉన్నతాధికారులు స్పందించి పారదర్శక విచారణ జరిపించాలని, అర్హులైన ఉద్యోగులకు అన్యాయం జరగకుండా తగిన చర్యలు తీసుకోవాలని కోరుతున్నారు.
Slug: korukollu-cooperative-society-parvathi-removal-controversy-2026