జన గళం ఆంధ్రప్రదేశ్ డెస్క్: కృష్ణా జిల్లా మచిలీపట్నంలో స్మశాన వాటికల దుర్భర పరిస్థితిపై జనసేన పార్టీ నగర అధ్యక్షుడు గడ్డంరాజు ప్రత్యేక దృష్టి సారించారు. మచిలీపట్నం కలెక్టరేట్లో నిర్వహించిన గ్రీవెన్స్ కార్యక్రమంలో భాగంగా జాయింట్ కలెక్టర్ నవీన్ను కలిసి ఆయన వినతి పత్రం సమర్పించారు. నగరపాలక సంస్థ ప్రత్యేక అధికారిగా బాధ్యతలు నిర్వర్తిస్తున్న కృష్ణా జిల్లా కలెక్టర్ డీకే బాలాజీ మచిలీపట్నంలోని వివిధ స్మశాన వాటికలను స్వయంగా పరిశీలించి, అక్కడ కనీస మౌలిక వసతులు కల్పించే దిశగా తక్షణ చర్యలు తీసుకోవాలని ఆ వినతి పత్రంలో ఆయన కోరారు.
నగరంలోని అనేక స్మశాన వాటికలు కనీస వసతులకు నోచుకోకుండా అధ్వాన్నంగా మారాయని గడ్డంరాజు ఆవేదన వ్యక్తం చేశారు. అంతిమ సంస్కారాలు నిర్వహించే చోట కనీసం తాగునీరు, షెడ్లు, పితృదేవతలకు క్రతువు నిర్వహించుకునేందుకు తగిన సదుపాయాలు కూడా లేవని తెలిపారు. సరైన నిర్వహణ లేక అపరిశుభ్ర వాతావరణం నెలకొని తీవ్రమైన దుర్గంధం వెదజల్లుతోందని, అంతేకాకుండా అక్కడికి చేరుకోవడానికి కనీసం రహదారులు కూడా లేని దుస్థితిలో ఉన్నాయని ఆయన వివరిస్తూ జేసీ దృష్టికి తీసుకువెళ్లారు.
జనసేన నేత విజ్ఞప్తిపై జేసీ నవీన్ సానుకూలంగా స్పందించినట్లు గడ్డంరాజు పేర్కొన్నారు. వెంటనే మున్సిపల్ అధికారులను పిలిచి నగరంలోని స్మశాన వాటికలను పరిశీలించి తక్షణమే మౌలిక వసతులు కల్పించాలని అధికారులకు జేసీ ఆదేశాలు జారీ చేశారని తెలిపారు. గతంలో నగరపాలక సంస్థ ప్రత్యేక అధికారి పాలనా కాలంలో అన్యాక్రాంతమైన స్మశాన వాటికలను పరిరక్షించిన విషయాన్ని ఈ సందర్భంగా గుర్తుచేశారు. మానవ జీవితంలో చివరి మజిలీ అయిన స్మశాన వాటికలను ప్రస్తుత ప్రత్యేక అధికారి, కలెక్టర్ డీకే బాలాజీ ప్రత్యేక శ్రద్ధతో అభివృద్ధి పరుస్తారన్న పూర్తి ఆశాభావాన్ని గడ్డంరాజు వ్యక్తం చేశారు.
Slug: machilipatnam-burial-grounds-development-gaddam-raju