జన గళం ఆంధ్రప్రదేశ్ డెస్క్: అహింసా వాదం, సత్యమేవ జయతే నినాదాలతో భారతదేశానికి స్వాతంత్ర్యం తెచ్చిన మహాత్మా గాంధీ ఆశయ సాధన కోసం ప్రతి ఒక్కరూ కృషి చేయాలని మచిలీపట్నం లేడీ యాంప్తిల్ ప్రభుత్వ బాలికల కళాశాల విద్యార్థినిలు, అధ్యాపకులు పిలుపునిచ్చారు. పూజ్య బాబూజీ మహాత్మా గాంధీ జయంతిని పురస్కరించుకుని కళాశాల ప్రాంగణంలో ఎన్ఎస్ఎస్ యూనిట్ ఆధ్వర్యంలో ప్రత్యేక వేడుకలను ఘనంగా నిర్వహించారు. ఈ సందర్భంగా గాంధీజీ అడుగుజాడల్లో నడుస్తామని, ఆయన చూపిన శాంతి మార్గాన్ని అనుసరిస్తామని విద్యార్థినిలు సామూహిక ప్రతిజ్ఞ చేశారు.
కళాశాల ప్రిన్సిపాల్ పి. లక్ష్మి అధ్యక్షతన జరిగిన ఈ కార్యక్రమంలో కళాశాల అభివృద్ధి కమిటీ సభ్యులు, ప్రముఖ న్యాయవాది లంకిశెట్టి బాలాజీ ముఖ్య అతిథిగా పాల్గొని స్వాతంత్ర్య ఉద్యమంలో మచిలీపట్నం ప్రాముఖ్యతను వివరించారు. ఉప్పు సత్యాగ్రహంలో మచిలీపట్నం సమీపంలోని చినపురం గ్రామం కీలక పాత్ర పోషించిందని, ఆనాటి గ్రామస్తులు తమ ఒంటిపై ఉన్న బంగారాన్ని సైతం స్వాతంత్ర్య ఉద్యమం కోసం విరాళంగా ఇచ్చి దేశానికి స్ఫూర్తిని నింపారని కొనియాడారు. మహాత్మా గాంధీ ఆనాటి ఆంధ్ర జాతీయ కళాశాలను సందర్శించారని, మచిలీపట్నంలో జన్మించిన భోగారాజు పట్టాభి సీతారామయ్యను ఆల్ ఇండియా కాంగ్రెస్ అధ్యక్షుడిగా ఎంపిక చేయడం మన ప్రాంతానికే గర్వకారణమని ఆయన గుర్తుచేశారు.
ఈ సందర్భంగా ప్రిన్సిపాల్ పి. లక్ష్మి మాట్లాడుతూ గాంధీజీ ఆచరించిన నిరాడంబర జీవితం నేటి యువతరానికి ఎంతో ఆదర్శప్రాయమని పేర్కొన్నారు. సత్యం పలకడం, తోటి మనుషులను ప్రేమించడం, ఎవరికీ హాని తలపెట్టకుండా జీవించడం వంటి సత్ప్రవర్తనను విద్యార్థులు అలవర్చుకోవాలని సూచించారు. ఎంసీపీఎల్ డైరెక్టర్ కొల్లు జ్ఞాన సాయి మాట్లాడుతూ నీతి, నిజాయితీలతో కూడిన పోరాటంతో దేశానికి స్వాతంత్ర్యం తెచ్చిన మహనీయులలో గాంధీజీ అగ్రగణ్యులని తెలిపారు. వారి త్యాగఫలితంగానే నేడు మనం స్వేచ్ఛా వాయువులు పీల్చుకోగలుగుతున్నామని అన్నారు.
ఈ కార్యక్రమంలో ఎన్ఎస్ఎస్ ప్రోగ్రామ్ అధికారి లంకిశెట్టి హరినాథ్ బాబుతో పాటు అధ్యాపకులు విజయశ్రీ, మున్వర్, సురేష్ తదితరులు మరియు కళాశాల సిబ్బంది, విద్యార్థినిలు పెద్ద సంఖ్యలో పాల్గొని మహాత్మా గాంధీ చిత్రపటానికి పూలమాలలు వేసి ఘన నివాళులర్పించారు.
Slug: machilipatnam-lady-ampthill-college-gandhi-jayanti-celebrations