జన గళం ఆంధ్రప్రదేశ్ డెస్క్: కేంద్రంలో నరేంద్ర మోదీ నేతృత్వంలోని ప్రభుత్వం అందిస్తున్న సుపరిపాలనతో పాటు రాష్ట్రంలో కూటమి ప్రభుత్వం చేపడుతున్న అభివృద్ధి కార్యక్రమాలను ప్రజల్లోకి తీసుకువెళ్లేందుకు భారతీయ జనతా పార్టీ నాయకులు ముదినేపల్లి మండలంలో విస్తృత ప్రచార కార్యక్రమం నిర్వహించారు. మోదీ 12 ఏళ్ల సుపరిపాలన మరియు కామినేని అభివృద్ధి పాలన నినాదంతో ముదినేపల్లి గ్రామ పరిధిలోని నాలుగు మరియు ఐదు వార్డులలో బీజేపీ నాయకులు కోటప్రోలు కృష్ణ గారి నాయకత్వంలో గడప గడపకు ప్రచారాన్ని చేపట్టారు. ఈ సందర్భంగా ఇంటింటికీ తిరిగి కేంద్ర, రాష్ట్ర ప్రభుత్వాల సంక్షేమ పథకాలను, అభివృద్ధి విధానాలను ప్రజలకు వివరించారు.
ప్రధానమంత్రి నరేంద్ర మోదీ నాయకత్వంలో దేశవ్యాప్తంగా అమలవుతున్న మౌలిక వసతుల కల్పన, సంక్షేమ కార్యక్రమాలతో పాటు ఆంధ్రప్రదేశ్ అభివృద్ధికి కేంద్ర ప్రభుత్వం అందిస్తున్న అండదండలను నాయకులు ప్రజలకు తెలియజేశారు. పోలవరం ప్రాజెక్టు నిర్మాణం, అమరావతి రాజధాని అభివృద్ధి, జాతీయ రహదారులు, రైల్వేలైన్లు, ఆధునిక పోర్టులు అలాగే భారత్‌నెట్ డిజిటల్ కనెక్టివిటీ తదితర కీలక ప్రాజెక్టుల పురోగతిని వివరించారు. రాష్ట్రంలో ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కళ్యాణ్ మరియు స్థానిక ప్రజాప్రతినిధుల సమన్వయంతో రాష్ట్రం అన్ని రంగాల్లోనూ ముందుకు సాగుతోందని పేర్కొన్నారు.
కైకలూరు నియోజకవర్గ శాసనసభ్యులు డాక్టర్ కామినేని శ్రీనివాస్ గారి నాయకత్వంలో నియోజకవర్గంలో జరుగుతున్న అభివృద్ధి పనులను ఈ ప్రచారంలో ప్రత్యేకంగా ప్రస్తావించారు. కలిదిండి భోగేశ్వర స్వామి ఆలయ అభివృద్ధికి ఐదు కోట్ల రూపాయల భారీ నిధులు మంజూరు చేయించడంతో పాటు, నియోజకవర్గంలో సిమెంట్ మరియు పీటీ రోడ్ల నిర్మాణం, విద్యుత్ సబ్‌స్టేషన్ల ఏర్పాటు, పంట కాలువల అభివృద్ధి, డ్రైనేజీ వ్యవస్థ మెరుగుదల వంటి పనులను వివరించారు. ముఖ్యంగా ఆక్వా రైతులకు యూనిట్‌కు రూపాయి యాభై పైసలకే విద్యుత్ అందిస్తున్న ఘనత కూటమి ప్రభుత్వానిదేనని స్పష్టం చేశారు.
ప్రచార సమయంలో గ్రామస్థులను కలిసి వారి సమస్యలను అడిగి తెలుసుకున్న బీజేపీ నాయకులు, వాటిని సంబంధిత అధికారుల దృష్టికి తీసుకెళ్లి త్వరితగతిన పరిష్కారానికి కృషి చేస్తామని హామీ ఇచ్చారు. ఈ కార్యక్రమంలో బీజేపీ జిల్లా ప్రధాన కార్యదర్శి నగరపాటి సత్యనారాయణ, జిల్లా కార్యదర్శి చేకూరి గణపతి, మండల అధ్యక్షురాలు సత్యవోలు నాగలక్ష్మి, కొల్లిపర నాగరాజు, నీలం మల్లేశ్వరరావు, అడుసుమిల్లి సాయి, నచ్చిరెడ్డి వెంకన్న, బండారు పాండురంగారావు, రెడ్డి నాగలక్ష్మి, వలిశెట్టి నాగజ్యోతి తదితరులు పెద్ద సంఖ్యలో పాల్గొని ప్రచారాన్ని విజయవంతం చేశారు.
Slug: mudinepalli-bjp-campaign-modi-governance-kamineni-development