జన గళం ఆంధ్రప్రదేశ్ డెస్క్: ఏలూరు జిల్లా జంగారెడ్డిగూడెం మండలం నాగులగూడెం గ్రామ ప్రజలు గత అనేక సంవత్సరాలుగా సరైన రోడ్డు సౌకర్యం లేక పడుతున్న తీవ్ర ఇబ్బందులకు శాశ్వత పరిష్కారం లభించింది. దశాబ్దాలుగా సరైన రహదారి వసతికి నోచుకోని ఈ సమస్యను స్థానిక ప్రజలు చింతలపూడి శాసనసభ్యులు శ్రీ సొంగ రోషన్ కుమార్ దృష్టికి తీసుకువెళ్లగా, ఆయన వెంటనే సానుకూలంగా స్పందించారు. ప్రజల కష్టాలను స్వయంగా అర్థం చేసుకున్న ఎమ్మెల్యే, తక్షణమే స్పందించి గ్రామానికి నూతన రోడ్డు సౌకర్యం మంజూరు చేయడమే కాకుండా పనులు వేగవంతంగా పూర్తయ్యేలా ప్రత్యేక చొరవ చూపారు.
దశాబ్దాల కాలంగా తమ గ్రామానికి సరైన రహదారి లేక అత్యవసర సమయాల్లో వైద్యం కోసం, రాకపోకల పరంగా పడిన అష్టకష్టాలను గ్రామస్తులు ఈ సందర్భంగా గుర్తుచేసుకున్నారు. ఎమ్మెల్యే సొంగ రోషన్ కుమార్ చొరవతో రోడ్డు నిర్మాణం పూర్తి కావడంతో నాగులగూడెం గ్రామ ప్రజల చిరకాల కోరిక నెరవేరినట్లయింది. ఈ అభివృద్ధి కార్యక్రమం ద్వారా గ్రామీణ ప్రాంతాల మధ్య రాకపోకలు సులభతరమవ్వడమే కాకుండా రైతులు, విద్యార్థులు, వృద్ధులు ఎదుర్కొంటున్న రవాణా ఇబ్బందులు పూర్తిగా తొలగిపోయాయని గ్రామస్తులు హర్షం వ్యక్తం చేశారు.
గ్రామ ప్రజల సమస్యలపై ఎప్పుడూ ముందుండే ఎమ్మెల్యే తమ ప్రాంత సమస్యను వెంటనే పరిష్కరించడం పట్ల గ్రామస్తులు అపారమైన సంతోషం వెలిబుచ్చారు. మీ స్పందన మా గ్రామానికి అభివృద్ధికి బాట అని పేర్కొంటూ నాగులగూడెం గ్రామ ప్రజల తరఫున ఎమ్మెల్యే శ్రీ సొంగ రోషన్ కుమార్కు వారు ప్రత్యేక కృతజ్ఞతలు, హృదయపూర్వక ధన్యవాదాలు తెలియజేశారు. కూటమి ప్రభుత్వం అధికారంలోకి వచ్చిన తర్వాత మారుమూల గ్రామాల్లోనూ మౌలిక వసతుల కల్పనకు పెద్దపీట వేస్తున్నామని, ప్రజా సమస్యల సత్వర పరిష్కారమే తమ ధ్యేయమని స్థానిక నాయకులు అభిప్రాయపడ్డారు.
Slug: nagulagudem-road-facility-thanks-mla-songa-roshan-kumar