జన గళం బిజినెస్ డెస్క్: దేశ ఆర్థిక రాజధాని ముంబై వేదికగా ‘సమైక్య 2026’ ముంబై లాంచ్ కార్యక్రమం అత్యంత వైభవంగా మరియు ఘనంగా జరిగింది. హైదరాబాద్లో ప్రారంభమైన ఈ వేదిక నేడు దేశవ్యాప్తంగా ఉన్న పారిశ్రామికవేత్తలు, వివిధ వాణిజ్య మండళ్లు, బ్యాంకింగ్ దిగ్గజాలు మరియు ఆర్థిక సంస్థలను ఒకే తాటిపైకి తెచ్చే శక్తివంతమైన వేదికగా విస్తరిస్తోంది. గుజరాత్ ఛాంబర్ ఆఫ్ కామర్స్, మహారాష్ట్ర ఛాంబర్ ఆఫ్ కామర్స్ (ఎంసీసీఐఏ), సిడ్బీ, స్టేట్ బ్యాంక్ ఆఫ్ ఇండియా, యాంఫీతో పాటు పలు ప్రముఖ పెట్టుబడి బ్యాంకింగ్ సంస్థల ప్రతినిధులు ఈ కార్యక్రమానికి హాజరై తమ మద్దతు తెలిపారు. దేశంలోని వివిధ ప్రాంతాల నుంచి వచ్చిన పారిశ్రామిక ప్రముఖులు, సీఈఓలు ఈ లాంచ్ వేడుకను విజయవంతం చేశారు.
ఈ ప్రతిష్టాత్మక కార్యక్రమానికి మహారాష్ట్ర రవాణా శాఖ మంత్రి ప్రతాప్ బాబురావ్ సర్నాయక్, రాజ్యసభ సభ్యులు డాక్టర్ కె. లక్ష్మణ్, భీమిలి శాసనసభ్యులు గంటా శ్రీనివాసరావుతో పాటు పలువురు ప్రముఖులు ముఖ్య అతిథులుగా విచ్చేశారు. ఈ సందర్భంగా మహారాష్ట్ర మంత్రి ప్రతాప్ బాబురావ్ సర్నాయక్ మాట్లాడుతూ, ముంబై మరియు మహారాష్ట్రలోని పలు ప్రధాన సాంకేతిక, మౌలిక వసతుల ప్రాజెక్టుల అభివృద్ధిలో తెలుగు రాష్ట్రాల పారిశ్రామికవేత్తల పాత్ర ఎంతో కీలకమని కొనియాడారు. సమైక్య వేదిక ద్వారా వివిధ రాష్ట్రాల మధ్య వ్యాపార సంబంధాలు మరింత బలపడతాయని ఆశాభావం వ్యక్తం చేస్తూ ఈ భాగస్వామ్యాన్ని సాదరంగా స్వాగతించారు.
ముంబైలో జరిగిన ఈ సన్నాహక సదస్సుతో దేశవ్యాప్తంగా ఏర్పడిన సానుకూల వాతావరణం భవిష్యత్తులో మరింత విస్తరించనుందని నిర్వాహకులు తెలిపారు. ఆంధ్రప్రదేశ్, తెలంగాణ, మహారాష్ట్ర, కర్ణాటక, తమిళనాడు తదితర రాష్ట్రాల నుంచి విచ్చేసిన ప్రముఖులు భవిష్యత్ వ్యాపార అవకాశాలపై చర్చించారు. దీని కొనసాగింపుగా అక్టోబర్ 14 మరియు 15 తేదీలలో హైదరాబాద్లోని హైటెక్స్ వేదికగా ‘సమైక్య 2026 – గ్లోబల్ బిజినెస్ మీట్’ ను అత్యంత వైభవంగా నిర్వహించనున్నట్లు ప్రకటించారు. ఈ అంతర్జాతీయ వ్యాపార సదస్సు దేశ విదేశాల నుంచి పారిశ్రామికవేత్తలను ఆకర్షించి, కొత్త పెట్టుబడులకు మరియు వ్యాపార విస్తరణకు గొప్ప అవకాశాలను సృష్టిస్తుందని నిర్వాహకులు వెల్లడించారు.
Slug: samakhya-2026-mumbai-launch-global-business-meet-hyderabad