రచన: జన గళం కాకినాడ డెస్క్: ఉమ్మడి తూర్పు గోదావరి జిల్లా రాజకీయాల్లో మరో ఆసక్తికరమైన రాజకీయ సమీకరణం తెరపైకి వచ్చింది. ప్రముఖ పారిశ్రామికవేత్త, కాకినాడ మాజీ పార్లమెంట్ అభ్యర్థి చలమలశెట్టి సునీల్ త్వరలోనే జనసేన పార్టీలో చేరబోతున్నారంటూ సోషల్ మీడియా వేదికగా జోరుగా ప్రచారం సాగుతోంది. ఈ పరిణామం కాకినాడతో పాటు జిల్లా రాజకీయ వర్గాల్లో పెను సంచలనం సృష్టిస్తోంది.
చలమలశెట్టి సునీల్ కాకినాడ ప్రాంతంలో సుపరిచితుడైన నేతగా, బలమైన వ్యక్తిగత కేడర్ ఉన్న నాయకుడిగా గుర్తింపు పొందారు. గతంలో ప్రజారాజ్యం, వైఎస్సార్ కాంగ్రెస్, టీడీపీ తరఫున కీలక ఎన్నికల పోరులో నిలిచిన ఆయన, క్షేత్రస్థాయిలో ప్రజలతో సత్సంబంధాలు కలిగి ఉన్నారు. ప్రస్తుతం రాష్ట్రంలో కూటమి ప్రభుత్వం అధికారంలో ఉండటం, పవన్ కళ్యాణ్ నాయకత్వంలోని జనసేన పార్టీ వేగంగా పుంజుకుంటున్న తరుణంలో.. సునీల్ జనసేన తీర్థం పుచ్చుకోవాలని యోచిస్తున్నట్లు వార్తలు వెల్లువెత్తుతున్నాయి. స్థానిక సంస్థల ఎన్నికల సమయం దగ్గరపడుతుండటంతో, కాకినాడ కార్పొరేషన్ మరియు పరిసర నియోజకవర్గాల్లో పట్టు సాధించేందుకు ఆయన చేరిక పార్టీకి కలిసివస్తుందని పలువురు విశ్లేషిస్తున్నారు. అయితే ఈ ప్రచారంపై చలమలశెట్టి సునీల్ లేదా జనసేన పార్టీ అధిష్టానం నుంచి ఇంకా ఎలాంటి అధికారిక ప్రకటన వెలువడలేదు. రానున్న రోజుల్లో ఆయన రాజకీయ భవితవ్యంపై స్పష్టత వచ్చే అవకాశం ఉంది.
