రచన: జన గళం పెడన డెస్క్: పెడన మండలం పుల్లపాడు పంచాయతీలో గురువారం ‘ఎన్టీఆర్ భరోసా’ సామాజిక పింఛన్ల పంపిణీ కార్యక్రమం పండుగ వాతావరణంలో జరిగింది. ఒకటో తేదీనే అర్హులైన పేదలందరికీ పింఛన్లు అందించాలన్న ప్రభుత్వ సంకల్పానికి అనుగుణంగా నిర్వహించిన ఈ కార్యక్రమంలో పెడన నియోజకవర్గ శాసనసభ్యులు కాగిత కృష్ణప్రసాద్ ముఖ్య అతిథిగా పాల్గొని లబ్ధిదారులకు పింఛన్ మొత్తాలను స్వయంగా అందజేశారు.
ఈ సందర్భంగా ఎమ్మెల్యే కాగిత కృష్ణప్రసాద్ లబ్ధిదారులతో ఆప్యాయంగా మాట్లాడుతూ వారి క్షేమసమాచారాలు, స్థానిక సమస్యలు మరియు అవసరాలను అడిగి తెలుసుకున్నారు. అనంతరం ఆయన మాట్లాడుతూ.. ప్రజా సంక్షేమమే పరమావధిగా కూటమి ప్రభుత్వం ముందుకు సాగుతోందని, ప్రభుత్వం అమలు చేస్తున్న ప్రతి సంక్షేమ ఫలం అర్హులైన పేదలకు పారదర్శకంగా అందేలా కృషి చేస్తామని స్పష్టం చేశారు. పేదరిక నిర్మూలన దిశగా నిరంతరం ప్రజాసేవలో ఉంటామని భరోసా ఇచ్చారు. తమ గ్రామానికి వచ్చి స్వయంగా పింఛన్లు అందజేసినందుకు స్థానిక లబ్ధిదారులు ఎమ్మెల్యేకు కృతజ్ఞతలు తెలిపారు. ఈ కార్యక్రమంలో కూటమి నాయకులు, కార్యకర్తలు, పంచాయతీ అధికారులు, సచివాలయ సిబ్బంది మరియు గ్రామ ప్రజలు పెద్ద సంఖ్యలో పాల్గొన్నారు.
