జన గళం కృత్తివెన్ను డెస్క్: విద్యార్థుల సంపూర్ణ ఆరోగ్య పరిరక్షణే ధ్యేయంగా ప్రభుత్వం చేపట్టిన జాతీయ నులిపురుగుల నిర్మూలన కార్యక్రమంలో భాగంగా శీతనపల్లిలోని శ్రీ భానోదయ పబ్లిక్ స్కూల్లో అవగాహన సదస్సు, మాత్రల పంపిణీ కార్యక్రమం ఘనంగా నిర్వహించారు. కృత్తివెన్ను ప్రాథమిక ఆరోగ్య కేంద్రం (PHC) వైద్యాధికారి డాక్టర్ సందీప్ ఆధ్వర్యంలో ఆసుపత్రి సిబ్బందితో కలిసి పాఠశాల విద్యార్థినీ విద్యార్థులందరికీ నులిపురుగుల నివారణ మాత్రలను పంపిణీ చేశారు.
ఈ కార్యక్రమానికి ముఖ్య అతిథిగా మండల తెలుగుదేశం పార్టీ సీనియర్ నాయకులు శ్రీ పిన్నెంటి రత్తయ్య హాజరై మాట్లాడారు. విద్యార్థులు శారీరకంగా, మానసికంగా ఆరోగ్యంగా ఉన్నప్పుడే చదువుల్లో రాణించగలరని, ప్రభుత్వం అందిస్తున్న ఇలాంటి ఆరోగ్య కార్యక్రమాలను సద్వినియోగం చేసుకోవాలని సూచించారు. అనంతరం డాక్టర్ సందీప్ మాట్లాడుతూ.. పిల్లల్లో రక్తహీనతను అరికట్టడానికి, రోగనిరోధక శక్తిని పెంపొందించడానికి ప్రతి ఒక్కరూ ఈ మాత్రలను తప్పనిసరిగా తీసుకోవాలని, వ్యక్తిగత పరిశుభ్రత పాటించాలని తెలిపారు. ఈ కార్యక్రమంలో పాఠశాల ఉపాధ్యాయ బృందం, వైద్య సిబ్బంది, స్థానిక ప్రముఖులు పాల్గొన్నారు.
