జన గళం ఆంధ్రప్రదేశ్ డెస్క్: పిఠాపురం నియోజకవర్గంలో చిన్నారుల బంగారు భవిష్యత్తును తీర్చిదిద్దే లక్ష్యంతో కార్పొరేట్ పాఠశాలలకు దీటుగా అత్యాధునిక హంగులతో నిర్మించిన నూతన మోడల్ అంగన్‌వాడీ కేంద్రాన్ని ఆంధ్రప్రదేశ్ ఉప ముఖ్యమంత్రి పవన్ కళ్యాణ్ నేడు ప్రారంభించనున్నారు. కేవలం నాలుగు గోడలకే పరిమితం కాకుండా భావి తరాలకు తొలి పాఠాలు నేర్పేలా, చిన్నారులకు చదువుతో పాటు ఆరోగ్యం, పోషకాహారం, వినోదభరిత ఆటపాటలతో కూడిన ఆహ్లాదకర వాతావరణం కల్పించేలా ఈ భవనాన్ని అద్భుతంగా తీర్చిదిద్దారు.
ఈ ఆదర్శ పాఠశాల నిర్మాణానికి అపోలో హాస్పిటల్స్ సామాజిక బాధ్యత నిధులతో దాదాపు కోటీ ముప్పై లక్షల రూపాయల భారీ వ్యయాన్ని వెచ్చించారు. కొణిదెల ఉపాసన కామినేని ప్రత్యేక శ్రద్ధతో ఈ ఆధునిక అంగన్‌వాడీ భవనాన్ని రూపుదిద్దారు. ప్రైవేట్ స్కూళ్లను తలపించేలా రంగురంగుల చిత్రాలు, ఆధునిక క్రీడా పరికరాలు, పరిశుభ్రమైన వాతావరణంతో విద్యార్థులను విశేషంగా ఆకట్టుకునేలా సకల సౌకర్యాలను ఇక్కడ సమకూర్చారు.
ఈ ప్రారంభోత్సవ వేదికపైనే నియోజకవర్గవ్యాప్తంగా మరో ముప్పై ఎనిమిది అంగన్‌వాడీ పాఠశాలల ఆధునీకరణ పనులకు డిప్యూటీ సీఎం పవన్ కళ్యాణ్ శంకుస్థాపన చేయనున్నారు. ఈ పైలట్ ప్రాజెక్ట్ విజయవంతమైతే భవిష్యత్తులో మరిన్ని ప్రభుత్వ పాఠశాలలు, అంగన్‌వాడీ కేంద్రాల అభివృద్ధికి అపోలో యాజమాన్యం మరియు కొణిదెల ఉపాసన తమ పూర్తి సహకారాన్ని విస్తరించనున్నట్లు తెలుస్తోంది. తమ ప్రాంత చిన్నారుల విద్యా ప్రగతికి ఎంతగానో ఉపయోగపడే ఈ బృహత్తర ప్రాజెక్ట్‌ను అందించినందుకు అపోలో సంస్థకు, రామ్‌చరణ్ మరియు ఉపాసన దంపతులకు పిఠాపురం ప్రజలు ప్రత్యేక కృతజ్ఞతలు తెలియజేస్తున్నారు.