జన గళం మంగళగిరి బ్యూరో: ఆంధ్రప్రదేశ్‌లో స్థానిక సంస్థల ఎన్నికల సన్నద్ధతలో భాగంగా జనసేన పార్టీ అధ్యక్షులు, ఉప ముఖ్యమంత్రి పవన్ కళ్యాణ్ రాయలసీమతో పాటు నెల్లూరు జిల్లాలపై ప్రత్యేక దృష్టి సారించారు. నెల్లూరు, చిత్తూరు, కడప, కర్నూలు, నంద్యాల పార్లమెంట్ నియోజకవర్గాలను సెంట్రల్ సపోర్ట్ టీమ్ ద్వారా ఆయన స్వయంగా పర్యవేక్షించాలని నిర్ణయించారు. ఈ పార్లమెంట్ స్థానాలకు ప్రధాన అడ్‌హాక్ కమిటీల బదులు క్షేత్రస్థాయి సమన్వయం కోసం కేవలం ‘నిర్వాహక్ దళ్’ బృందాలను మాత్రమే నియమించాలని ఆదేశించారు.
ఈ ఐదు పార్లమెంట్ నియోజకవర్గాల్లో పార్టీ బలం, ఆశావాహుల వివరాలు, కూటమి పార్టీల సమన్వయంపై సెంట్రల్ సపోర్ట్ టీమ్ ఎప్పటికప్పుడు క్షేత్రస్థాయి నుంచి నివేదికలను సేకరించి నేరుగా పవన్ కళ్యాణ్‌కు నివేదించనుంది. ఈ నివేదికల ఆధారంగా త్వరలోనే సంబంధిత నాయకులతో అధినేత స్వయంగా సమావేశమై ఎన్నికల వ్యూహాలపై దిశానిర్దేశం చేయనున్నారు. స్థానిక పోరు ముగిసే వరకు ఈ స్వీయ పర్యవేక్షణ కొనసాగుతుందని పార్టీ వర్గాలు స్పష్టం చేశాయి.
