జన గళం బాపట్ల/ఒంగోలు బ్యూరో: ఆంధ్రప్రదేశ్‌లో స్థానిక సంస్థల ఎన్నికల సమరానికి జనసేన పార్టీ వేగంగా అడుగులు వేస్తోంది. పార్టీ సంస్థాగత యంత్రాంగాన్ని క్షేత్రస్థాయిలో సమాయత్తం చేసే క్రమంలో బాపట్ల, నరసరావుపేట, ఒంగోలు, నెల్లూరు పార్లమెంట్ నియోజకవర్గాలకు స్థానిక సంస్థల ఎన్నికల కో-ఆర్డినేషన్ అడ్‌హాక్ కమిటీలు పూర్తిస్థాయిలో కార్యాచరణ ప్రారంభించాయి. దక్షిణ కోస్తా మరియు పల్నాడు ప్రాంతాల్లో పార్టీ ప్రాతినిధ్యాన్ని విస్తరించడమే లక్ష్యంగా ఈ కమిటీలు రంగంలోకి దిగాయి.
గ్రామ పంచాయతీలు, వార్డులు, మండలాల వారీగా పార్టీ బలాబలాలను అంచనా వేయడం, ఆశావాహుల వివరాల సేకరణ, మరియు కూటమి భాగస్వామ్య పార్టీలతో సఖ్యతను పర్యవేక్షించే బాధ్యతలను ఈ కమిటీలకు అప్పగించారు. నెల్లూరు పార్లమెంట్‌ను అధినేత పవన్ కళ్యాణ్ సెంట్రల్ సపోర్ట్ టీమ్ ద్వారా ప్రత్యేకంగా పర్యవేక్షిస్తుండగా, బాపట్ల, నరసరావుపేట, ఒంగోలు స్థానాల్లో అసెంబ్లీ నియోజకవర్గాల స్థాయి బృందాలు మరియు నిర్వాహక్ దళ్ సమన్వయంతో క్షేత్రస్థాయి నివేదికలను సిద్ధం చేస్తున్నారు. ఈ నివేదికల ఆధారంగా త్వరలోనే పార్టీ అధినాయకత్వం అభ్యర్థుల ఎంపిక, ప్రచార వ్యూహాలపై మార్గదర్శనం చేయనుంది.
