విజయవాడ, 2026 సెప్టెంబర్ 20, (జనగళం బ్యూరో):
నగర ప్రజలకు ఎటువంటి లాభాపేక్ష లేకుండా నిస్వార్థంగా సేవలందిస్తున్న ‘కలయిక టీం ఆర్గనైజేషన్’ ఉచిత ఫ్రీజర్ బాక్సులు, అంబులెన్స్ వ్యాన్లను స్వర్గపురి ప్రాంగణంలోనే భద్రపరచుకునేందుకు మున్సిపల్ యంత్రాంగం నుంచి అనుమతులు ఇప్పించాలని కోరుతూ పశ్చిమ నియోజకవర్గ టీడీపీ ఇన్ఛార్జ్ బుద్ధా వెంకన్నకు వినతిపత్రం సమర్పించారు. ఆదివారం పశ్చిమ నియోజకవర్గ పరిధిలోని మల్లికార్జునపేటలో గల బుద్ధా వెంకన్న కార్యాలయంలో మాజీ కార్పొరేటర్ ఉమ్మడి వెంకటేశ్వరరావు, ప్రముఖ నాయకులు చందన సురేష్ (మామ) తదితరులు ఆయనను మర్యాదపూర్వకంగా కలిసి విజ్ఞప్తి చేశారు.
వివరాలు ఇలా ఉన్నాయి, ఈ సందర్భంగా వారు మాట్లాడుతూ.. గత 2017లో అప్పటి నగర పాలక సంస్థ కమిషనర్ ఆధ్వర్యంలో కలయిక ఆర్గనైజేషన్ ద్వారా ఈ పవిత్ర సేవా కార్యక్రమాన్ని ప్రారంభించామని గుర్తుచేశారు. అప్పట్లో ఫ్రీజర్ బాక్సులు, అంతిమ యాత్ర వ్యాన్, ఫ్రీజర్ బాక్స్ వ్యాన్లను స్థానిక స్వర్గపురి ప్రాంగణంలోనే ఉంచుకునేందుకు అధికారులు అధికారిక అనుమతులు కూడా ఇచ్చారని వివరించారు. ఏ ఒక్కరి వద్ద నుంచి నయాపైసా ఆశించకుండా, తమ కుటుంబ సభ్యులు మరణించి పుట్టెడు దుఃఖంలో ఉన్న బాధిత కుటుంబాలకు తక్షణమే అవసరమైన ఫ్రీజర్ బాక్సులు, వాహనాలను ఉచితంగా అందిస్తూ విజయవాడ నగరవాసులకు ఎనలేని సేవలు అందిస్తున్నామని తెలిపారు.
వాహనాల భద్రతకు విఘాతం కలగకుండా చూడాలి:
ప్రస్తుత పరిస్థితుల్లో ఈ సేవా వాహనాలు, ఫ్రీజర్ బాక్సులను స్వర్గపురి ప్రాంగణం బయట రోడ్లపై ఉంచాల్సి వస్తోందని, దీనివల్ల అర్ధరాత్రి వేళల్లో తిరిగే సంఘ విద్రోహ శక్తుల వల్ల ఆ వాహనాలు ధ్వంసమయ్యే, పరికరాలు చోరీకి గురయ్యే తీవ్ర ప్రమాదం పొంచి ఉందని ఆవేదన వ్యక్తం చేశారు. ప్రజలకు అత్యవసర సమయాల్లో నిరంతరం అందుబాటులో ఉండేలా ఈ సేవా వాహనాలను స్వర్గపురి ఆవరణలోనే సురక్షితంగా ఉంచుకునేందుకు నగర పాలక సంస్థ అధికారులతో మాట్లాడి ప్రత్యేక అనుమతులు మంజూరు చేయించాలని బుద్ధా వెంకన్నకు విజ్ఞప్తి చేశారు. ప్రజా ప్రయోజనాల దృష్ట్యా ఈ సమస్య పరిష్కారానికి కృషి చేయాలని కోరారు. ఈ కార్యక్రమంలో నాయకులు గుర్రంకొండ, దనాల శ్రీను, పెద్ది రమేష్, పోతినేడి లోకేశ్వరరావు తదితరులు పాల్గొన్నారు.