రాజంపేట, 2026 సెప్టెంబర్ 20, (జనగళం బ్యూరో):
రాజంపేట నియోజకవర్గ వ్యాప్తంగా జనసేన పార్టీ సంస్థాగత బలం రోజురోజుకూ ఊపందుకుంటోంది. పట్టణంలోని సాతుపల్లి ప్రాంతానికి చెందిన వైఎస్సార్సీపీ, ఇతర పార్టీల ముఖ్య నాయకులు, కార్యకర్తలు ఆదివారం రాజంపేట పార్లమెంట్ జనసేన పార్టీ ఇన్చార్జ్ యల్లటూరు శ్రీనివాసరాజు సమక్షంలో భారీ ఎత్తున జనసేన పార్టీ తీర్థం పుచ్చుకున్నారు. స్థానిక నేతలు రేవూరి చిన్నా, రేవూరి మణిల ఆధ్వర్యంలో తరలివచ్చిన వందలాది మంది కార్యకర్తలు, మహిళలకు శ్రీనివాసరాజు పార్టీ కండువాలు కప్పి సాదరంగా ఆహ్వానించారు.
వివరాలు ఇలా ఉన్నాయి, ఈ చేరికల కార్యక్రమాన్ని పురస్కరించుకుని తొలుత రాజంపేట పట్టణంలోని జనసేన పార్టీ కార్యాలయం నుండి సాతుపల్లి వరకు జనసైనికులు, నాయకులు భారీ బైక్ ర్యాలీ నిర్వహించారు. సాతుపల్లి చేరుకున్న యల్లటూరు శ్రీనివాసరాజుకు స్థానిక మహిళలు, గ్రామ పెద్దలు పూర్ణకుంభం, మంగళ హారతులతో ఘన స్వాగతం పలికారు. అనంతరం జరిగిన బహిరంగ సభలో యల్లటూరు శ్రీనివాసరాజు ప్రసంగించారు.
పవన్ కళ్యాణ్ సిద్ధాంతాలు, కూటమి పాలనే పార్టీకి బలం:
ఈ సందర్భంగా యల్లటూరు శ్రీనివాసరాజు మాట్లాడుతూ.. జనసేన అధినేత, రాష్ట్ర ఉపముఖ్యమంత్రి కొణిదెల పవన్ కళ్యాణ్ నిస్వార్థ ప్రజాసేవ, కూటమి ప్రభుత్వం అమలు చేస్తున్న సమగ్ర అభివృద్ధి, సంక్షేమ ఫలాల పట్ల ఆకర్షితులై నేడు ఇతర పార్టీలను వీడి స్వచ్ఛందంగా జనసేనలోకి చేరుతున్నారని తెలిపారు. రాజంపేట నియోజకవర్గంలో పార్టీ ప్రస్థానం తిరుగులేని శక్తిగా ఎదుగుతోందని, పార్టీని నమ్ముకుని వచ్చిన ప్రతి ఒక్కరినీ గుండెల్లో పెట్టుకుని గౌరవిస్తామని స్పష్టం చేశారు.
మున్సిపాలిటీపై జనసేన జెండా ఎగురవేయాలి:
త్వరలో జరగనున్న పట్టణ స్థానిక సంస్థల ఎన్నికలను దృష్టిలో ఉంచుకుని శ్రేణులంతా సమష్టిగా, సమన్వయంతో క్షేత్రస్థాయిలోకి వెళ్లాలని ఆయన పిలుపునిచ్చారు. ముఖ్యంగా రాజంపేట మున్సిపాలిటీ పరిధిలోని ప్రతి వార్డులో పార్టీని పటిష్టం చేయడంతో పాటు, స్థానికంగా నెలకొన్న మౌలిక వసతులు, తాగునీరు, డ్రైనేజీ సమస్యల పరిష్కారానికి, పట్టణ సమగ్రాభివృద్ధికి కూటమి ప్రజాప్రతినిధులతో కలిసి నిరంతరం కృషి చేస్తామని భరోసా ఇచ్చారు. ఈ కార్యక్రమంలో రాజంపేట పట్టణ, మండల స్థాయి జనసేన పార్టీ నాయకులు, వీరమహిళలు, జనసైనికులు పెద్ద ఎత్తున పాల్గొన్నారు.