జన గళం ఆంధ్రప్రదేశ్ డెస్క్: కృష్ణా జిల్లా మొవ్వ మండల కేంద్రంలో గ్రామీణ పారిశుద్ధ్యాన్ని మరింత పటిష్టం చేసే దిశగా కీలక ముందడుగు పడింది. మొవ్వ గ్రామ పంచాయతీ పరిధిలో ఏర్పాటు చేసిన అత్యాధునిక తడి చెత్త, పొడి చెత్త వేరుచేసే (సెగ్రిగేషన్) యంత్రాన్ని పామర్రు శాసనసభ్యులు వర్ల కుమార్ రాజా ముఖ్య అతిథిగా విచ్చేసి రిబ్బన్ కత్తిరించి లాంఛనంగా ప్రారంభించారు. గ్రామంలో పేరుకుపోతున్న వ్యర్థాలను శాస్త్రీయ పద్ధతిలో శుద్ధి చేసి, స్వచ్ఛ గ్రామంగా తీర్చిదిద్దే లక్ష్యంతో ఈ వినూత్న యంత్రాన్ని అందుబాటులోకి తీసుకువచ్చారు.
ఈ సందర్భంగా ఎమ్మెల్యే వర్ల కుమార్ రాజా మాట్లాడుతూ.. గ్రామాల్లో ప్రజారోగ్యం మెరుగుపడాలంటే పరిశుభ్రత అత్యంత ఆవశ్యకమని, శాస్త్రీయ వ్యర్థాల నిర్వహణతోనే అది సాధ్యమవుతుందని పేర్కొన్నారు. గ్రామస్తులందరూ బాధ్యతాయుతంగా వ్యవహరించి తమ ఇళ్ల వద్దే తడి చెత్త, పొడి చెత్తను వేర్వేరుగా విభజించి పంచాయతీ పారిశుద్ధ్య సిబ్బందికి అందించాలని విజ్ఞప్తి చేశారు. గ్రామీణ ప్రాంతాల్లో మౌలిక వసతుల కల్పనతో పాటు పరిశుభ్రమైన వాతావరణం నెలకొల్పేందుకు కూటమి ప్రభుత్వం ప్రాధాన్యత ఇస్తుందని తెలిపారు. ఈ కార్యక్రమంలో మండల స్థాయి ప్రభుత్వ అధికారులు, గ్రామ పంచాయతీ ప్రతినిధులు, తెలుగుదేశం-జనసేన-బీజేపీ కూటమి సీనియర్ నాయకులు, కార్యకర్తలు పెద్ద సంఖ్యలో పాల్గొన్నారు.