జన గళం ప్రత్యేక ప్రతినిధి, విజయవాడ: విజయవాడ నగరంలోని అత్యంత కీలకమైన పటమట సబ్ రిజిస్ట్రార్ కార్యాలయం (కళా నగర్) వద్ద సరైన డ్రైనేజీ వ్యవస్థ లేకపోవడంతో చిన్నపాటి వర్షానికే ప్రధాన రహదారి పూర్తిగా జలమయమై చెరువును తలపిస్తోంది. రోజూ వందలాది మంది క్రయవిక్రయదారులు, రిజిస్ట్రేషన్ల కోసం వచ్చే ప్రజలు, డాక్యుమెంట్ రైటర్లు కార్యాలయానికి చేరుకోవడానికి మోకాళ్ళ లోతు మురుగునీటిలో నడవలేక తీవ్ర ఇబ్బందులు పడుతున్నారు. నీటి నిల్వలతో పాదచారులు కాలు బయట పెట్టలేని దుస్థితి నెలకొంది.
వర్షపు నీరు రోడ్డుపై పెద్ద ఎత్తున నిలిచిపోవడంతో ఆటోలు, ద్విచక్ర వాహనాలు, కార్లు నిలిచిపోయి తీవ్ర ట్రాఫిక్ స్తంభించిపోతోంది. గుంతలు కనిపించక ద్విచక్ర వాహనదారులు అదుపుతప్పి పడిపోయే ప్రమాదం పొంచి ఉందని స్థానికులు ఆందోళన వ్యక్తం చేస్తున్నారు. ప్రభుత్వానికి భారీగా ఆదాయాన్ని సమకూర్చే కీలకమైన సబ్ రిజిస్ట్రార్ కార్యాలయం ఎదుటే ఈ దుస్థితి ఉన్నప్పటికీ సంబంధిత మున్సిపల్ అధికారులు పట్టించుకోవడం లేదని ప్రజలు మండిపడుతున్నారు. వర్షాకాలం మొదలైతే పరిస్థితి మరింత దారుణంగా మారే ప్రమాదం ఉందని, వీఎంసీ ఉన్నతాధికారులు తక్షణమే స్పందించి డ్రైనేజీ పూడికతీత పనులు చేపట్టి వర్షపు నీరు సాఫీగా వెళ్లేలా చర్యలు తీసుకోవాలని విజ్ఞప్తి చేస్తున్నారు.
