Slug: jasthi-sambasiva-rao-deputy-mayor-post-vijayawada
జన గళం విజయవాడ డెస్క్:
విజయవాడ నగర అభివృద్ధి మరింత వేగవంతం కావాలంటే రాజకీయ అనుభవం, ప్రజాసేవ పట్ల నిబద్ధత కలిగిన నాయకులకు కీలక బాధ్యతలు అప్పగించాలని ప్రముఖ విద్యావేత్త, లయోలా కళాశాల విశ్రాంత ఆచార్యులు డాక్టర్ అన్నే రవికుమార్ అభిప్రాయపడ్డారు. పలుమార్లు కార్పొరేటర్‌గా ఎన్నికైన జాస్తి సాంబశివరావుకు డిప్యూటీ మేయర్ పదవి కల్పించాలని ఆయన కోరారు.
జాస్తి సాంబశివరావుకు ప్రజాప్రతినిధిగా ఉన్న అనుభవం, స్థానిక ప్రజలతో ఉన్న అనుబంధం నగర పాలనలో ఉపయోగపడతాయని డాక్టర్ అన్నే రవికుమార్ పేర్కొన్నారు. ప్రజా సమస్యలపై అవగాహన, క్షేత్రస్థాయిలో ప్రజలకు అందుబాటులో ఉండే స్వభావం, రాజకీయ అనుభవం ఉన్న వ్యక్తులకు ఉన్నత బాధ్యతలు అప్పగించడం ద్వారా నగర అభివృద్ధికి మరింత మేలు జరుగుతుందని వివరించారు.
వెటర్నరీ కాలనీ, సెంట్రల్ ఎక్సైజ్ కాలనీ తదితర ప్రాంతాలకు చెందిన పలువురు నగర ప్రముఖులు కూడా జాస్తి సాంబశివరావుకు డిప్యూటీ మేయర్ పదవి కల్పించాలనే అభిప్రాయాన్ని వ్యక్తం చేస్తున్నారని ఆయన తెలిపారు. క్రమశిక్షణ, నీతి, నిజాయితీతో కూడిన నాయకత్వం ప్రజలకు మరింత చేరువగా ఉంటుందని పేర్కొన్నారు.
విజయవాడ నగరంలో రహదారులు, పారిశుధ్యం, తాగునీరు, మౌలిక సదుపాయాలు, ప్రజా సమస్యల పరిష్కారం వంటి అంశాలపై సమర్థవంతమైన పాలన అవసరమని, అనుభవజ్ఞులైన ప్రజాప్రతినిధులకు బాధ్యతలు అప్పగిస్తే ఈ లక్ష్యాల సాధనకు తోడ్పడుతుందని అభిప్రాయపడ్డారు.
జాస్తి సాంబశివరావుకు డిప్యూటీ మేయర్ పదవి ఇవ్వాలనే తమ అభిప్రాయాన్ని సంబంధిత పార్టీ నాయకత్వం పరిశీలించాలని డాక్టర్ అన్నే రవికుమార్ విజ్ఞప్తి చేశారు.