జన గళం ఆంధ్రప్రదేశ్ డెస్క్: బంగాళాఖాతంలో ఏర్పడిన వాతావరణ మార్పులు, తుపాను ప్రభావంతో నియోజకవర్గంలో కురుస్తున్న భారీ వర్షాల నేపథ్యంలో గుడివాడ శాసనసభ్యులు శ్రీ వెనిగండ్ల రాము అధికార యంత్రాంగాన్ని అప్రమత్తం చేశారు. గుడివాడలోని ప్రజా వేదిక కార్యాలయం నుంచి ఆర్డీవో బాలసుబ్రమణ్యం, మున్సిపల్ కమిషనర్ సింహాద్రి మనోహర్, విద్యుత్, రెవెన్యూ, డ్రైనేజీ తదితర శాఖల ఉన్నతాధికారులతో ఆయన అత్యవసర టెలీకాన్ఫరెన్స్ నిర్వహించారు. క్షేత్రస్థాయిలో వర్షాల ప్రభావం, చేపట్టిన సహాయక చర్యలు, ముందస్తు జాగ్రత్తలపై సమగ్రంగా ఆరా తీశారు. ముఖ్యంగా బుడమేరు వరద ఉధృతిపై ప్రత్యేకంగా సమీక్షించగా, ఎగువ ప్రాంతాల నుంచి వస్తున్న ప్రవాహాన్ని నిరంతరం పర్యవేక్షిస్తున్నామని, ప్రస్తుతం ఎటువంటి ఆందోళన చెందాల్సిన అవసరం లేదని ఆర్డీవో వివరించారు.
పట్టణంలో శానిటేషన్, డ్రైనేజీ వ్యవస్థలపై ప్రత్యేక శ్రద్ధ వహించాలని మున్సిపల్ కమిషనర్ను ఎమ్మెల్యే ఆదేశించారు. ఆర్టీసీ బస్టాండ్ ఆవరణలో, ప్రధాన రహదారులపై వర్షపు నీరు నిలవకుండా మోటార్ల ద్వారా ఎప్పటికప్పుడు మళ్లించాలని సూచించారు. క్షేత్రస్థాయిలో ఎక్కువ మంది సిబ్బంది రోడ్లపై అందుబాటులో ఉండాలని, వర్షాలు తగ్గాక అంటువ్యాధులు ప్రబలకుండా పారిశుద్ధ్య పనులను ముమ్మరం చేయాలని స్పష్టం చేశారు. గ్రామీణ ప్రాంతాల్లో విద్యుత్ సరఫరాకు అంతరాయం కలగకుండా చూడాలని, అధికారులు, కూటమి శ్రేణులు సమన్వయంతో పనిచేస్తూ ప్రజలకు అండగా నిలవాలని పిలుపునిచ్చారు. అత్యవసర సమయాల్లో ప్రజలు టోల్ఫ్రీ నంబర్లను ఆశ్రయించాలని విజ్ఞప్తి చేశారు. గత ఏడాది వరదల సమయంలో అద్భుతంగా పనిచేసిన స్ఫూర్తితోనే ఈసారి కూడా సమర్థవంతంగా విధులు నిర్వర్తిస్తున్న యంత్రాంగాన్ని ఎమ్మెల్యే వెనిగండ్ల రాము ప్రత్యేకంగా అభినందించారు.
Slug: gudiwada-heavy-rains-teleconference-mla-venigandla-ramu-rdo-municipal-commissioner-alert