రచన: జన గళం మచిలీపట్నం డెస్క్: మచిలీపట్నం (బందరు) కేంద్రంగా గుర్తింపు పొందిన ప్రముఖ ఆభరణాల సంస్థ గోల్డ్ ప్రిన్స్ జువెలరీ ప్రాంగణం నుంచి అంతర్జాతీయ నాణ్యతా ప్రమాణాలతో సరికొత్త ప్రపంచ స్థాయి బ్రాండ్ ‘శిల్ప’ (Silpa) రూపుదిద్దుకుంది. ఈ విశిష్ట బ్రాండ్ ద్వారా అత్యంత నైపుణ్యంతో రూపొందించిన అమరావతి బుద్ధుడు, సాగరతీర విజయగణపతి వెండి కళాఖండాలను ఆంధ్రప్రదేశ్ ముఖ్యమంత్రి శ్రీ నారా చంద్రబాబు నాయుడుకి ఘనంగా బహూకరించారు.
రాష్ట్ర గనుల మరియు ఎక్సైజ్ శాఖ మంత్రి కొల్లు రవీంద్ర ఆధ్వర్యంలో గోల్డ్ ప్రిన్స్ అధినేత చలమలశెట్టి నరసింహారావు, ఉత్సవ కమిటీ సభ్యులు వేమూరి బలరత్నం మరియు కొల్లూరు వెంకట శివకుమార్ ముఖ్యమంత్రిని మర్యాదపూర్వకంగా కలిసి ఈ అపురూప కళాఖండాలను అందజేశారు. సాంప్రదాయక కళా నైపుణ్యం, ఆధునిక సాంకేతికత మేళవింపుతో తయారైన ఈ విగ్రహాల సునిశిత రూపురేఖలను చూసి సీఎం చంద్రబాబు నాయుడు ఎంతగానో హర్షం వ్యక్తం చేశారు. చారిత్రక బందరు నగరం నుంచి ఇంతటి అద్భుతమైన నాణ్యతతో కూడిన శిల్పాలను రూపొందించి ప్రపంచ మార్కెట్‌కు పెద్ద ఎత్తున పరిచయం చేయాలని, సంస్థ మరింత ఉన్నత స్థాయికి ఎదగాలని ముఖ్యమంత్రి ప్రత్యేకంగా అభినందనలు, శుభాకాంక్షలు తెలియజేశారు. బందరు కళా ప్రతిభను ప్రపంచ పటంలో నిలబెట్టిన ‘శిల్ప’ బ్రాండ్ రూపకర్త చలమలశెట్టి నరసింహారావుపై స్థానికులు, వ్యాపార వర్గాలు ప్రశంసల వర్షం కురిపిస్తున్నాయి.