జన గళం ఆంధ్రప్రదేశ్ డెస్క్: కైకలూరు నియోజకవర్గంలో న్యాయవాదుల రక్షణ చట్టాన్ని (Advocates Protection Act) తక్షణమే రూపొందించి అమలు చేయాలని డిమాండ్ చేస్తూ కైకలూరు బార్ అసోసియేషన్ ఆధ్వర్యంలో చేపట్టిన రిలే నిరాహార దీక్షలు కొనసాగుతున్నాయి. ఈ ఆందోళనకు సంపూర్ణ మద్దతు తెలిపేందుకు ఆంధ్రప్రదేశ్ ప్రభుత్వ అస్యూరెన్స్ కమిటీ చైర్మన్, కైకలూరు శాసనసభ్యులు డాక్టర్ కామినేని శ్రీనివాస్ గారు నేరుగా కోర్టు ఎదుట దీక్షా శిబిరానికి విచ్చేశారు. అక్కడ రిలే నిరాహార దీక్ష కూర్చున్న కైకలూరు బార్ అసోసియేషన్ లాయర్లను కలిసి సంఘీభావం తెలిపి, వారి సమస్యల గురించి వివరంగా అడిగి తెలుసుకున్నారు.
ఈ సందర్భంగా ఎమ్మెల్యే డా. కామినేని శ్రీనివాస్ మాట్లాడుతూ, న్యాయవాదుల రక్షణ చట్టాన్ని వెంటనే తీసుకురావాలనే వారి డిమాండ్ ఎంతైనా న్యాయమైనదని స్పష్టం చేశారు. ఇది కేవలం లాయర్ల వ్యక్తిగత ప్రయోజనాల కోసం అడుగుతున్నది కాదని, సమాజంలో న్యాయవ్యవస్థను మరియు ప్రజాస్వామ్యాన్ని బ్రతికించుకోవడానికి ఇది అత్యంత ఆవశ్యకమని ఆయన పేర్కొన్నారు. ఒక ప్రజాప్రతినిధిగా, మీ స్థానిక ఎమ్మెల్యేగా న్యాయవాదుల ఆవేదనను, ఈ సమంజసమైన డిమాండ్‌ను ప్రభుత్వ దృష్టికి తీసుకువెళ్లడంలో ముందుంటానని భరోసా కల్పించారు. రాబోయే అసెంబ్లీ సమావేశాల్లో న్యాయవాదుల రక్షణ చట్టం గురించి ఖచ్చితంగా గళం విప్పుతానని, చట్టసభల్లో ఈ బిల్లు పాస్ అయ్యేలా తన వంతు పూర్తి స్థాయి ప్రయత్నం చేస్తానని ఆయన హామీ ఇచ్చారు.
ఈ సంఘీభావ కార్యక్రమంలో మాజీ శాసనమండలి సభ్యులు కమ్మిలి విఠల్ రావు గారు, నియోజకవర్గ టీడీపీ కన్వినర్ కొత్తా నాగేంద్ర కుమార్ గారు, ఎన్డీఏ (NDA) కూటమి నాయకులు, స్థానిక ప్రజాప్రతినిధులు, బార్ అసోసియేషన్ సభ్యులు మరియు పెద్ద సంఖ్యలో కార్యకర్తలు పాల్గొన్నారు.
Slug: kaikaluru-advocates-protection-act-protest-kamineni-srinivas